Тываның Баштыңы Владислав Ховалыг октябрь 12-де демдеглээри Көдээ ажыл-агый ажылдакчызының хүнүнде агроүлетпүр комплекизиниң ажыл-ишчилеринге байырны чедирген.
«Көдээ ажыл-агый бистиң республиканың экономиказының эң чугула кезээ, аъш-чем хандырылгазының үндезини болгаш социал турум чоруктуң дөзү болуп артпышаан. Тываның агроүлетпүрүн орулгалыг болдурар дээш, чаа технологияларны киирип, болбаазырадылганы хөгжүдүп, фермерлерни деткип, тускай сорулгалыг ажылдап турар бис» - деп, Владислав Ховалыг бодунуң блогунда бижээн.
Тывада көдээ ажыл-агый дээрге экономиканың кол адыры болбушаан, чоннуң хөй кезииниң амыдырал-чуртталгазының дөзү болур. Мал ажыл-агыйы дыка хөй өг-бүлелерниң тодуг-догаа чуртталгазында кол черни ээлеп, регионнуң экономиктиг хөгжүлдезинге идигни берген. Республиканың көдээ ажыл-агый адырында мал ажыл-агыйы — башкарыкчы черде.
Регионалдыг Көдээ ажыл-агый болгаш аъш-чем яамызының дыңнатканы-биле алырга, амгы үеде республиканың көдээ ажыл-агый адырында 152 көдээ ажыл-агый организациязы, 2600 ажыг тараачын ажыл-агыйлар болгаш хууда сайгарлыкчылар, 24 муң ажыг хууда дузалал ажыл-агыйлары бар, олар республиканың шупту өрегелериниң 34 хуузун тургузуп турар.
Тыва бодунуң агроүлетпүр комплекизин хөгжүдер төлевилелдерни боттандырарын федералдыг чазактың болгаш чурттуң Президентизи Владимир Путинниң деткимчези-биле уламчылап турарын республика Баштыңы онзалап демдеглээн. Чижээлээрге, Чеди-Хөл кожуунда суггарылга системазын бо чылын катап тургузуп, ажыглалче кииргени-биле арбын дүжүттү ажаап, адырның турум хөгжүлдезин хандырган.
Бо чылын кол инвестиция төлевилелдери уламчылаар, оларның аразында Кызыл кожуунга 200 баш мал семирти азыраар черни база 80 тонна чедир борбактаан мал чем бүдүрер цехти тудары, Таңды кожуунда эът консервазы бүдүрер модульдуг цехти база Эрзин кожуунга арыг хой эъди бүдүреринге хой ажыл-агыйын тускайлаары көрдүнген.
ТР-ниң Чазааның парлалга албаны.