Волонтёрлар хүнүнге тураскааткан байырлыг хемчеглер Кызыл хоорайга Аныяктар өргээзинден эгелээн. Декабрь 5-те эки турачыларның «Доброфорум–2024» регионалдыг шуулганынга 17 кожуундан ниитизи-биле 150 ажыг кижи киришкен.
ТР-ниң аныяктар херектериниң талазы-биле сайыды Субудай Оюн шуулганның өөредилгелиг кезээн ажыткаш, бүгү республикадан келген волонтёрларга байырын чедирген.
«Эки турачылар дээрге чугула хемчеглер болгаш акциялар эрттиреринге бодунуң үезин-даа, күжүн-даа хайыра чокка өргүүрүнге белен, кол шимчедикчи күш-түр.
Келир чылын Ада-чурттуң Улуг дайынынга тиилелгениң 80 чылдаан оюн демдеглээр болгай, ынчангаш бүдүн чыл дургузунда аңаа тураскааткан 40 ажыг хемчеглер планнаттынган. Ону организастаарынга «Тиилелгениң волонтёрлары» регионалдыг штабты тургускан. Штабты чоорту кожууннарже база калбартыр» — деп, сайыт чугаалаан.
Тывада 10 ажыг волонтёрлар организациялары ажылдап турар деп ол демдеглээн. Волонтёрлар шимчээшкинин сайзырадыр ажылдар уламчылап турар. РФ-тиң Президентизи Владимир Путинниң бот-идепкейи-биле тургускан 2030 чылга чедир эчис сорулгалар езугаар хөй-ниити ажылдарының база волонтёрлар шимчээшкининиң киржикчилериниң аразынга аныяктар 45 хуудан хөй турар ужурлуг. Аныяктарны волонтёр ажылынче хаара тудары-биле чаа организацияларны тургузар болгаш солун хемчеглерни эрттирери волонтёржу бот-идепкейжилерни деткиириниң чугулазын айтып турар дээрзин аныяктар сайыды демдеглээн.
Тес-Хем кожууннуң спорт болгаш аныяктар политиказының талазы-биле эргелелиниң кол специализи Олча Төмүр ук кожууннуң делегациязын удуртуп келген: «Бөгүнгү шуулганга 5 волонтёр келдивис. Келген бир сорулгавыс – өске кожууннар-биле арга-дуржулга солчуру. Бүдүн Тес-Хем кожуунда 162 эки турачы бар. Оларның хөй кезии аныяктар. Эки турачыларывыс ТШО-да дайынчыларга камгалал четкилери аргыыр, лаалар кылыр, гуманитарлыг дуза чыыр ажылдарда, ол ышкаш улуг назылыг кижилерниң бажыңнарын аштап-арыглаарынга, ыяш-дажын чыып белеткээринге дузалажып турар. Кожуунда бүгү-ле хөй-ниити ажылдары база янзы-бүрү хемчеглер волонтёрларның киржилгези-биле эртип турар».
«Таврида» кластерниң амбассадору, Россияның аныяк сайгарлыкчылар клувунуң лидери Наталья Донгур аныяктар херектериниң талазы-биле хөй-ниити ажылын чорудуп турар. Ол бо шуулганга киржип келгенинге өөрүп турарын чугаалаан:
«Волонтёрларга, ол ышкаш Төрээн чуртувустуң чаагай чоруу дээш дуза кадып чоруур улустуң ажылын үнелеп чоруур кижилерге бо дыка улуг байырлал-дыр. Волонтёр кижи бүрүзү долгандыр турар кижилерге улуг күш болгаш деткимче-дир.
ТР-ниң Аныяктар херектериниң талазы-биле яамы бо шуулганны организастаанынга өөрүп четтирип тур мен. Чүге дизе чүгле волонтёрларның дузазын көөр эвес, оларга база кичээнгей, деткимче херек. Олар боттарының эң-не үнелиг үезин чарып, күжүн үндүрүп, ынакшылын, деткимчезин көргүзүп чоруур болгай. Волонтёр дээрге-ле кандыг-даа үеде кижилерге дузазын көргүзүп кээр, сагыш човангыр кижи-дир. Оларга сагыш салыышкыны, күш-ажылы, кичээнгейи дээш четтиргенимни илередир-дир мен. Ынчангаш Төрээн чуртувустуң чаагай чоруу дээш шуптуңарны эки турачы болурунче кыйгырдым».
Шуулган үезинде республикада эң-не идепкейжи, шылгараңгай аныяктар илеткелдерни кылып, волонтёрлар аразынга арга-дуржулга солчулгазы болган, флеш-моб-биле уламчылаан.
Алдынай СОЯН.
Буян Ооржактың тырттырган чуруктары.
«Шын» №94 2024 чылдың декабрь 7
