Өөредиглиг чугаа
Бир-ле катап бажыңның кыс ээзи казапчазынче үнүп келгеш көөрге, херим иштинде үш узун ак салдыг ирейлер кирип келген болган. «Аштап, суксаан боор силер. Бажыңче кирип, аъштанып-чемненип көрүңерем» — деп, херээжен кижи эки сеткили-биле хүндүлеп чалаан.
«Бис бажыңче шупту катай кирип шыдавас бис» — деп, олар харыылаан. «Чүге?» — деп, херээжен элдепсинип айтырган.
Ирейлерниң бирээзи тайылбырлаан: «Бо эжимни Байлак дээр — деп, ол бир ирейже айыткаш чугаалаан — «А бо Кадыкшыл-дыр» — дээш өскезинче айыткан — «А мени Ынакшыл дээр» — деп, ол бодун таныштырган.
Оон немей чугаалаан: «Ам бажыңыңче киргеш, ашааң-биле бистиң кайывысты аалчы кылдыр көрүксеп турарын чугаалаш».
Херээжен бажыңынче киргеш, ашаанга шуптузун чугаалаан. Өгнүң эр ээзи дыка өөрээн.
«Экизин аа, бир эвес шилиир чүве болза, Байлакты чалаар-дыр. Бисче киргеш, бажыңывысты бай-байлаа-биле долдурупсун!» — деп, ол чугаалаан.
Кадайы чөпшээрешпейн: «Кадыкшылды чалап алзывысса кандыгыл, эргимим?» — дээн.
Оларның уруу ада-иезиниң чугаазын дыңнап олургаш: «А чүге Ынакшылды чалап болбас бис? Ынчан бажыңывысты Ынакшыл бүргей бээр» — деп саналдаан.
«Уруувустуң саналынга чөпшээрежир бис бе. Үнгеш Ынакшылды чалап эккел» — деп, ашак кадайынга чугаалаан.
Кадай үнүп келгеш: «Араңарда Ынакшыл кымыл? Бажыңче эртип, бистиң хүндүлүг аалчывыс болуңар» — дээн.
Ынакшыл деп аттыг ирей бажыңче кылаштаарга, соондан ийи эжи база эдерипкен.
Элдепсинген кадай Байлак биле Кадыкшылдан айтырган-дыр: «Мен чүгле Ынакшылды чаладым, силер кай баарыңар ол?»
Ирейлер харыылаан: «Бир эвес силер Байлак биле Кадыкшылдың кайы-бирээзин чалаан болзуңарза, өске ийивис даштыгаа артып каар турган. Ынчалза-даа силер Ынакшылды чаладыңар. Ол кайнаар баар, бис соондан чоруур бис. Кайда Ынакшыл бар, Байлак биле Кадыкшыл база ында».
«Шын» №66 2024 чылдың август 31
