Наадым байырлалының бир онзагай мөөрейи — «Ыраажы малчын». Республика чергелиг бо мөөрей 3 дугаар чыл эртип турар.
«Мөөрейниң суму болгаш кожуун чергелиг эге чадалары тус черлерге болган. Кожууннарга ниитизи-биле 96 кижи киришкен. Оларның аразында кандыг-даа назы харлыг малчыннар бар. «Аныяк өг-бүлеге – кыштаг», «Инек – чемгерикчи малым» деп төлевилелдерниң киржикчилери-даа, муңчулар-даа, чемпионнар малчыннар-даа киржип турар. Бо удаада мөөрейниң республика чергелиг чадазынга 16 ыраажы киришкен. Оларның ону херээжен кижи, а арткан алдызы эр улус» — деп, Улусчу чогаадылга бажыңының ажылдакчызы Ай-кыс Дамба чугаалады.
«Ыраажы малчын» мөөрейиниң киржикчизи Чейнеш Салчак: «Бо мөөрейде Мөңгүн-Тайга кожуунну төлээлеп келдим. Өөм ээзи Артыш Салчак 2023 чылдың Наадымының мурнакчылар одуруунче киргеш, сиген кезер, чер чардырар техниканы шаңналга алды. Ол сарлык кадарчызы. Чеди оол, бир кыстыг бис. Ырлаарынга ынак мен, ынчалза-даа ажы-төлүм чаш, кылыр ажылым хөй болгаш, мөөрейлерге киришпейн чордум. Ам ажы-төлүм шору доруга берген. Ынчангаш бо чылын «Ыраажы малчын» деп мөөрейге киржир деп шиитпирлеп алдым. Хөй чон мурнунче, улуг сценаже бир дугаар үнерим бо».
Жюри кежигүннери Россияның алдарлыг артистери Надежда Шойгу, Кайгал-оол Ховалыг, ТР-ниң алдарлыг артизи Станислав Ириль олар Тыва Республиканың уран чүүлүнүң алдарлыг ажылдакчызы Елена Ондарның удуртулгазы-биле «Ыраажы малчын» мөөрейниң киржикчилериниң күүселдезинге үнелелди бергеш, түңнелдерни үндүрген.
«Ыраажы малчын – 2023», 1-ги чергениң лауреады деп атты Чөөн-Хемчик кожууннуң төлээзи, 2020 чылдың «Чаа сорук» губернатор төлевилелиниң киржикчизи Алла Ондар алгаш, 50 муң рубль-биле шаңнаткан.
2-ги чергениң лауреады, Сүт-Хөл кожууннуң Кара-Чыраа сумузунуң малчыны Буян Моңгуш 30 муң рубль-биле шаңнаткан.
«Инек – чемгерикчи малым» губернатор төлевилелиниң Эрзин кожууннуң 2019 чылда киржикчизи Шеңне Соян болгаш Кызыл кожууннуң Баян-Кол сумузунуң малчыны Артыш Ооржак олар 3-кү чергениң лауреады атты алгаш, 10–10 муң рубль-биле шаңнаткан.
Айдың ОНДАР.
"Шын" №61, 2023 чылдың август 19