Республиканыӊ Чазаанга кывар-чаар чүүлдерниӊ өртээн хынап, сайгарып турар дээрзин Тываныӊ Баштыӊы Владислав Ховалыг тайылбырлаан.
«Бензин болгаш дизельдиг кывар чүүл өртээниӊ өзүп турарын республиканыӊ Чазаа сайгарып турар. Ол кол айтырыгларныӊ бирээзи-дир. Хыналданыӊ көргүзүглери-биле алырга, Тывада кывар-чаар чүүлдүӊ ортумак өртээ: АИ-92 - 61 рубль, АИ-95 - 64,41 рубль, дизельдиг кывар чүүл 73 рубль апарган.
Тарифтер албаныныӊ дыңнадыышкыны-биле республиканыӊ Монополияга удур федералдыг албаныныӊ эргелели кывар-чаар чүүлдүӊ өртээниӊ канчаар тургустунганын хынап көрген. Нефть барааннарыныӊ садар өртээнге тус черниӊ сайгарлыкчыларыныӊ чежени немээнин хынап, сайгарып көрген.
Хажыдыышкыннар болгаш дугуржуп алган хире чүүлдер илереттинмээн дээрзин Монополияга удур федералдыг албанныӊ эргелелиниӊ удуртукчузу Феликс Алексеевич Хаджиев чугаалаан.
Кывар-чаар чүүлдерни мөөӊү-биле садып-саарар рынокта өртектер өскен, өртектер ооӊ ужурундан өзүп турар. Дүүн Санкт-Петербургта Делегейниӊ чиг-эт барааннарыныӊ биржазынга АИ-92 маркалыг бензин биле дизельдиг кывар-чаар чүүл өртээ чаа рекорд тургускан.
Байдалды таарыштыр уштап-башкарып болур, бо чооккү үеде канчаар ажылдаарын бүдүрүкчүлер-биле Россияныӊ Чазаа аразында дугуржуп алыр дээрзин чурттуӊ Президентизи Владимир Путин Чөөн чүктүӊ экономиктиг шуулганыныӊ ниити хуралыныӊ үезинде чугаалаан.
Өртектерниӊ өскенинден аӊгыда, республиканыӊ автозаправка станцияларында кывар-чаар чүүлдерниӊ курлавыры бисти база дүвүредип турар. Бөгүн Таӊды кожуунда бензин биле дизельдиг кывар чүүл чок деп медээ келди. Мөӊгүн-Тайга биле Тожу кожууннарда база дизельдиг кывар чүүлдүӊ чогунуӊ дугайында чагыргалары дыӊнаткан.
Тываныӊ Одаар чүүл болгаш энергетика яамызынга даалга бердим. Олар Кызыл хоорайныӊ курлавырындан кывар-чаар чүүлдү алгаш, ийи кожуунга чедирип бээриниӊ талазы-биле дарый хемчег алган. Кывар-чаар чүүлдүӊ шуут чок болу бергени бистиӊ сайгарлыкчыларывыстыӊ үезинде чагыг киирип четтикпейн барганы-биле холбаалыг дээрзи сайгарылгадан көстүп келген.
Республиканыӊ одаар чүүл болгаш энергетика яамызы автозаправкаларда кывар-чаар чүүлдерниӊ бар-чогун хүннүӊ-не хынап турар. Херек апарган таварылгаларда сайгарлыкчыларга дузалажыр» деп, республиканыӊ удуртукчузу Влдаислав Ховалыг социал четкиде блогунга бижээн.
Р. Демчик белеткээн.