Хоорай чергелиг Каа-Хем суурнуң Радиостанция кудумчузунда «Амгы үениң школазы» деп федералдыг төлевилел-биле 825 олуттуг чаа школа туттунуп турар. Амгы үеде тудуг объектизиниң ажылдарының 28 хуузу кылдынган.
Тудугну 2 чадага кылыры көрдүнген. 2022 чылда «Сельстрой» КХН хүлээнип алган турган. Амгы үеде тудугнуң бирги каъдында ханалары 90 хуу туттунган, ийиги каътта ажылдар 50 хуу күүсеттинген. Ажылды график езугаар чорудуп турар.
«Госстройзаказ» КХН-ниң директору Экер Биче-оолдуң дыңнадыы-биле алырга, бо хүннерде бирги каътты тудуп үндүрүп турда, бетоннуң аарын угбайн, эки быжыглаттынмаан дузалал конструкциязы кээп дүшкен. Аңаа кым-даа кемдевээн.
– Ол дээрге тудугга бо-ла болу бээр ажыл-агыйжы байдал-дыр. Хоойлу-дүрүм езугаар хүлээникчи организация болган таварылга дугайында биске дыңнаткан, шынар чок кылган ажылының түңнелин боттарының акша-хөреңгизи-биле эде кылыр ужурлуг— деп, Экер Биче-оол чугаалаан.
Тудуг ажылдарының хуусаазын бо таварылга дээш саадатпас ужурлуг, ол ышкаш тудуг ажылдарының өртек-үнези улгатпас деп, «Сельстрой» КХН-ниң удуртукчузу Сергей Сафрин дыңнаткан.
– 100 дөрбелчин метр шөлге далаш-биле туткан, эки быжыглаваан дузалал конструкциязы буступ дүшкенинден бирги каътка бетон кудар ажылды доозуп шыдавайн бардывыс. Понедельникке чедир бригада шуптузун аштап- арыглааш, вторниктен тура ажылды катап эгелээр — чаа дузалал конструкцияны тургускаш, оон бетон кудар. Ол ажылдың чарыгдалын «Сельстрой» боду дуглаар. Күүседикчи организацияның ажыл сметазынга болгаш тудугнуң хуусаазынга ол чүүл шаптык болбас — деп, Сергей Сафрин чугаалаан.
Тудуг ажылдары доостурга, Тыва Республиканың Күрүнениң тудуг хайгаарал албанының комиссиязы шупту нормативтиг хыналданы чоруткаш, түңнел чөпшээрелди берген соонда, «Госстройзаказ» КХН объектини республика өнчүзүнче шилчидер.
Амгы үеде тудугда 65 кижи болгаш 4 кран биле чүък машиназы ажылдап турар. Тудуг ажылдарын 2024 чылга чедир доозары планнаттынган.
Бистиң корр.
"Шын" №59, 2023 чылдың август 9