Россия Федерациязының Чазааның Күрүне Думазынга чыл санының Айыткалынга Россияның көдээ ажыл-агый адырында хөгжүлдениң өзүлдези бар деп, РФ-тиң Чазааның Даргазы М. Мишустин демдеглээн.
Көдээ ажыл-агый техниказының болгаш дериг-херекселдерниң чартыындан хөйүн амгы үеде Россияның бодунда кылып үндүрүп турар. 30 муң ажыг тракторларны, комбайннарны, өске-даа машиналарны көдээ бүдүрүлгелер эрткен чылын алган. Көдээ ажыл-агый продукциязын сайгарып садары база көвүдээн. Ол дээрге көдээниң ажыл-ишчилери тараа, эът, ногаа дээш өске-даа продукцияны көвүдедир бүдүрүп үндүрүп турар апарганының херечизи. Көдээ ажыл-агыйлар дүжүт ажаап өстүреринге чылдың-на чаа рекордтарны тургузуп келгеннер. РФ-тиң Көдээ ажыл-агый яамызының сан-чурагайы-биле алырга, шывыглыг (теплица) черлерге огурец, помидор дээш өске-даа ногаа аймаан, кат-чимисти тарып өстүрерин көвүдеткен, ажык черлерге база ногаа болгаш кат аймаа тарып өстүрери база көвүдээн. Эрткен 2024 чылда ристиң, сояның болгаш рапстың эң бедик, рекордтуг дүжүдүн ажаап алган.
Күрүнениң талазындан көдээ ажыл-агый адырын деткиири күштелген. 2025 чылда көдээни деткиири-биле федералдыг бюджетте ниитизи-биле 500 млрд рубль ажыг акша көрдүнген. Хөгжүлдениң национал сорулгаларын күүседип тура, көдээ ажыл-агыйны деткиир ажылды системалыг угланыышкынныг чорудары чугула деп, Михаил Мишустин айыткан. Продукция бүдүрүлгезиниң хемчээлин улгаттырарынга, бүдүрүлгелерниң орулгалыг болурун бедидеринге таарымчалыг байдалдарны тургузары чугула. Россия Федерациязының агроүлетпүр комплекизин мурнады деткиириниң шупту кол угланыышкыннарын кадагалап арттырып шыдаанын РФ-тиң Чазааның Даргазы дыңнаткан. Девискээрлерниң онзагай талаларын барымдаалап, кандыг угланыышкынга күрүнеден деткимче херегин регионнар боттары шилип ап турарлар. Ол дээрге уксаалыг мал азырап өстүреринге, элита шынарлыг тараа үрезини тарып өстүреринге, көдээ ажыл-агый продукциязын ханы болбаазырадырынга акшаландырыышкынны алыры дээш оон-даа өске угланыышкыннар. Тарылгага, дүжүт ажаалдазынга чиигелделиг чээлилерни база берип турар.
Көдээ ажыл-агый продукциязын садып-саарарының талазы-биле база оперативтиг хемчеглерни ап келген. Барааннарны даштыкыже үндүр сатпас, колдуунда чурт иштинге артып калзын дээш, көдээ ажыл-агый продукциязын чурттан үндүр сөөртүрүн түр када кызыгаарлаан. Чижээлээрге, тараа культураларын, тарымал тоорук үзүн даштыкыже үндүр садарын эвээжеткен. Ооң түңнелинде Россияның хереглекчилериниң эрге-ажыктарын камгалаан.
Иштики рынокту аъш-чем-биле немей долдурары чугула деп көргеш, Россия-биле найыралдыг чурттардан продуктуларны киир сөөртүрүн түр када көвүдеткен. Саржагны, эътти, картофельди, морковьту, яблокту киир сөөртүрүнге каайлы үндүрүүн эвээжеткен, чүге дээрге чугула хереглелдиң барааннары-биле хандырылганың дең-дески чоруун тургузуп, өртектерниң дүрген өзерин чавырылдырары чугула турган.
Өртектерни деңзигүүрлүг деңнелге тударынга Монополияга удур федералдыг албан чугула рольду ойнаан. Чамдык таварылгаларда барааннарның хенертен өзери 50 хуу чедип турарын Монополияга удур федералдыг албан илереткен. Бо албан чери үнүүшкүннүг хыналдаларны доктаамал чорудуп, сагындырыгларны берип, өртектерни өйлээр талазы-биле ажылды чорудуп турар.
Көдээ ажыл-агый продукциязының өртектерин кызыгаарлаары-биле бүдүрүкчүлер, сайгарлыкчылар болгаш садыг четкилери кады ажылдаарынга шыңгыы деткимчениң аргаларын күрүне регионнарга бергенин РФ-тиң Чазааның Даргазы Михаил Мишустин сагындырган.
РФ-тиң Чазааның ажык медээлеринден алган.
Чурукту интернеттен хоолгалаан.
«Шын» №12 2025 чылдың апрель 3