Тывада «Зарница 2.0» деп шериг-патриотчу оюннуң регионалдыг чадазы 55-ки гвардейжи мото-адыгжы (даг) бригаданың девискээринде эртип турар. Хемчегниң кол эрттирикчилери– Баштайгыларның шимчээшкининиң болгаш Юнармияның Тывада салбырлары.
Хөй салгалдарның ынак патриотчу оюну «Зарница 2.0» сан-чурагайлыг технологияларны ажыглап тургаш, шынарлыг чаа, амгы үениң хевиринче эглип келген.
Баштайгы мөөрейлерни бичии назылыг бөлүкке, 7 хардан 10 харга чедир уруглар аразынга эрттирген. Регионалдыг чадага чүгле тус черлерге шылгарааннар киржир эргени чаалап алганнар. Ниитизи-биле 16 команда күжүн шенежип келген. Ол ышкаш ыраккы Мөңгүн-Тайгадан, Бай-Тайгадан, Тожудан, Өвүрден, Сүт-Хөлден бичии патриоттар база киржип турар. "Зарница 2.0" бүдүн май дургузунда Тывага болуп эртер.
Регионалдыг чада өске-даа назы-харлыг бөлүктерге көрдүнген. Бөлүк бүрүзүнүң тиилекчилери Сибирь федералдыг округка Тываны төлээлээр.
Бистиң корр.
Чуруктарны "Баштайгыларның шимчээшкини" регионалдыг салбырдан алган.
«Шын» №18 2025 чылдың май 15
