Россияның парлалга хүнүнге тураскааткан байырлыг хурал Тываның Чазааның бажыңынга январь 13-те болуп эрткен.
Тыва Республиканың Баштыңы Владислав Ховалыг ол хуралга киржип, республиканың массалыг информация чепсектериниң журналистеринге болгаш ажылдакчыларынга Россияның парлалга хүнү-биле байырны чедирип, регионда хүн бүрүде ажыл-херектерни, чоннуң амыдырал-чуртталгазын, ниитилелде болуушкуннарны олар бүгү талалыг чырыдып турары тус черде удуртукчу органнарга херек кырында байдалдарны сайгарып көөрүнге, боттуг шиитпирлерни хүлээп алырынга, чедиишкиннерден бурунгаар шимчээринге ужур-дузалыг дээрзин демдеглээн.
Тываның эрес-дидим дайынчы орус оолдары миномётчу Шумов алышкыларга болгаш Украинада тускай шериг операциязының киржикчилери чаңгыс чер чурттугларывыска тураскаалдарны тургусканы дээш өске-даа онзагай шериг-патриотчу болуушкуннар Улуг Тиилелгениң 80 чылында республикага болганын, оларны ханы утка-шынарлыг кылдыр чырытканы дээш, Владислав Ховалыг регионнуң журналистеринге өөрүп четтиргенин илереткен.
Чаа 2026 чылда республикага эртер буддистерниң делегей шуулганын чырыдарда, Тываның национал онзагай талаларын регионнуң журналистери бир янзы кылдыр көргүзеринге бүзүрелин илередип, ол улуг шуулган Тываның ат-алдарын, ооң чонунуң сүлде-сүзүүн улам бедидир көдүреринге улуг ужур-дузалыг болуушкун деп демдеглээн.
Тываның парлалга органнарынга, радио болгаш телевидениеге чедиишкинниг ажылдаан, массалыг информация чепсектерин сайзырадырынга көскү үлүүн киирген журналистерге болгаш ажылдакчыларга Тыва Республиканың Баштыңының шаңналдарын тывыскан.
Тыва Республиканың Баштыңының Өөрүп четтириишкин бижиин “Тыва” КТРК-ның телеоператору Экер Орланович Доңгакка, корреспондент Саглай Александровна Сарыгларга, автомашиналар слесары Виталий Федорович Пичи-оолга, автотранспорт участогунуң начальниги Альберт Карын-оолович Таргынга тывыскан.
Ак сеткилдиг ажылы, парлалга болгаш массалыг информация чепсектериниң четкилерин сайзырадырынга киирген үлүү дээш Тыва Республиканың Баштыңының Хүндүлел бижии-билереспубликаның кадык камгалалының “Тыва Республиканың медицинаның информас-аналитиктиг төвү” албан чериниң директорунуң оралакчызы Чечена Бадыевна Булытованы, Тыва Республиканың Баштыңының Администрациязының болгаш Тыва Республиканың Чазааның Аппарадының информастыг политика департаментизиниң күрүне пабликтери– контент-төп талазы-биле ажылды башкарар килдистиң начальниги Виктория Викторовна Кондрашованы, Тыва Республиканың “Тывамедиабөлүк” парлалга бажыңы” күрүнениң автономнуг албан чериниң килдизи “Тувинская правда” солуннуң кол редактору Юлия Валерьевна Манчин-оолду, Тыва Республиканың “Тывамедиабөлүк” парлалга бажыңы” күрүнениң автономнуг албан чериниң фото, дизайн болгаш корректура килдизиниң начальниги Алдынмаа Александровна Тюлюшту шаңнаан.
Массалыг информация чепсектерин сайзырадырынга киирген үлүү болгаш хөй чылдарда ак сеткилдиг ажылы дээш “Тыва Республиканың алдарлыг ажылдакчызы” атты Тыва Республиканың “Тывамедиабөлүк” парлалга бажыңы” күрүнениң автономнуг албан чериниң фото, дизайн болгаш корректура килдизиниң орус дыл талазы-биле улуг корректору Надежда Петровна Германга, Тываның Юрий Кюнзегеш аттыг ном үндүрер чериниң хоочуну Валентина Шагдыровна Чамьянга тывыскан.
Ш. МОҢГУШ.
Буян Ооржактың болгаш Чиңгис СААЯНЫҢ тырттырган чуруктары.
“Шын” №1 2026 чылдың январь 15
