Эрткен неделяга деңнээрге, аарып турар кижилерниң саны 23 хуу эвээжээн. Ындыг болзажок сула салдынып болбас дээрзин Тыва Республиканың кол санитар эмчизи Л. Салчак чазактың аппарат хуралында дыңнаткан. “Россияда вирустуң чаа хевири – эң халдавырлыг омикрон кирип келгенин билир силер. А Чаа чыл бүдүүзүнде, кышкы дыштанылга хүннеринде, соңгаартан студентилер чанып кээп, пассажирлер аргыжылгазы көвүдей бээринден, аарыг республикага кээп болур. Ынчангаш арыг-силигниң бөдүүн дүрүмнерин, кызыгаарлаан хемчеглерни сагып, орун фондузун база эм-таң курлавырын доктаамал хайгаарап, белен турары чугула” – деп дыңнаткан.
Декабрьның 6-дан 12 хүннеринде лаборатория ковидтээн 299 кижиниң аарыын бадыткаан. Ооң мурнунда неделяга деңнээрге 93 кижи эвээш (ноябрьның 29-тан декабрь 5-ке чедир 392 аарыг кижи турган).
Ак-Довурак хоорайда болгаш Сүт-Хөл кожуунда аараан таварылгалар хөй болуп артпышаан, азы 27-27 аарыг кижилер немешкен. Сентябрь айдан бээр, чаңгыс-даа аарыг чок турган Тере-Хөлде 1 кижи аараан.
Бо хүнде эмнелге албан черлеринде 662 кижи эмнедип турар. Амбулаторлуг эмнээшкинде ковидтиг 404 кижи бар болза, стационарларда 258 кижи эмнедип чыдар. Ол 258 кижиниң 77-зи аар байдалдыг болза, 181 кижиниң байдалы ортумак.
Дыштаныр хонуктарда 510 орун фондузун 390 кылдыр кызырган. Бо хүнде ол оруннарның 33,8 хуу, азы 132-зи – хостуг.
“Планныг эмчи дузазының чарыгдалдарын кызырбайн, коронавирус аарыын нептеретпес дээш, хамаатыларга халас эмчи дузазының көргүзер чарыгдалдарны дуглаар кылдыр РФ-тиң Чазааның курлавыр фондузундан Тыва Республика 402 млн рубльди алыр. РФ-тиң Чазааның бо чылдың декабрь 4-те 3448-р дугаарлыг айтыышкынында ол айыттынган. Ынчангаш республиканың кадык камгалал системазының турум ажылын хандырары-биле, ооң курлавырларын быжыглап, көвүдедир херек. Республиканың кадык камгалал сайыды А. Югай, Россияның Кадык камгалал яамызы-биле дарый харылзажып, немелде акша-хөреңги алыр керээни дарый чарарын дагзып тур мен” — деп, Тываның Баштыңы В. Ховалыг аппарат хуралында кадык камгалал сайыдынга сагындырган.
Тываның Чазааның парлалга албаны.
#Коронавирус #Эпидбайдал #Кадыккамгалаляамызы #Тыва #Тува #Шынсолун #Тывадыл #Тывамедээ #Tuva #Shyntuva
