Республикада «Улусчу участок шагдаазы – 2021» Бүгү-российжи мөөрейниң онлайн-бадылаашкынныг ийиги регион чадазы доозулган. Россияның Иштики херектер яамызының «Таңды» муниципалдар аразында Эрзин суурда 11 дугаар полиция пунктузунуң участок төлээзи, полицияның лейтенантызы Аюш Александрович Монгуш улусчу бадылаашкынның түңнелинде эң хөй үннү алган.
Тыва Республиканың Иштики херектер яамызының дыңнатканы-биле алырга, Аюш Монгуш 2017 чылдың сентябрьда иштики херектер органнарынга ажылдап эгелээн. 2018 чылдың марттан бо хүнге чедир Эрзин кожууннуң эң ыраккы Мөрен суурунда полицияның участок төлээзи албанын эрттирип турар. Ооң харыылаан участогу 900 ажыг кижи чурттакчылыг, бо чылын ол девискээрге чаңгыс-даа кем-херек үүлгедиишкини бүрүткеттинмээн.
Полицияның лейтенантызы Монгуш суму чонунуң бүзүрелин чаалап алган, тургустунган айтырыгларны шиитпирлээринге кезээде дузаны кадарынга белен, а кол шынары - профилактика ажылдарынче эң харыысалгалыг көөр.
Ажылыңарда эң кол чедиишкиниңер дээн айтырыгга, чонунга бүзүрелдиг бараан болуп, дуза кадарынга кезээде белен болурунче чүткүп чоруурун, а ону кызымаккай күш-ажыл база кижи бүрүзүнге кичээнгейлиг хамаарылга-биле чедип алыр деп, Аюш Александрович харыылаан.
Россияның Иштики херектер яамызының албан езунуң сайтызында «Улусчу участок шагдаазы – 2021» бүгү-российжи мөөрейниң (https://мвд.рф/) онлайн-бадылаашкынның төнчү кезээ ноябрьның 1-ден эгелээр, республиканың чурттакчылары Тывадан чаңгыс чер-чурттуун деткип, “Улусчу участок шагдаазы” дээш боттарының үнүн берип, соңгуп болур.
ТР-ниң Чазааның парлалга албаны.
#Улусчуучастокшагдаазы_2021 #ИХЯ #Мөөрей #Тыва #Тува #Шынсолун #Тывадыл #Тывамедээ #Tuva #Shyntuva
