Тываның арга-дуржулгалыг сайгарлыкчыларының бирээзи Ульяна Ооржакты танывас кижи чок дизе, частырыг турбас. Ол национал аъш-чемни болбаазырадып, бүдүрер аъш-чем кылыр ажылын алды чыл бурунгаар эгелээн. Баштай-ла ак сүттен, божадан доңуруп каан амданныг чемнерни, арбайдан шоколадтарны бүдүрүп эгеледи. Улаштыр-ла, ажылын улам калбартып, каш янзы национал аъш-чемни бо хүннерге чедир кылып турар.
Бо чоокку чылдарда национал аъш-чеминге немей арбай далганын хаптааш, дораан кылып чиптер кылдыр бүдүре берди. Моон алгаш көөрге, бо сайгарлыкчының ажыл-агыйга кызымаккайын, бурунгаар чүткүлдүүн эскерип болур. Нацонал чемнер кылыр дериг херекселин бичиилеп садып ап келген, баштай бичежек херексел, ооң соонда мороженоени хөйү-биле кылыптар дериг-херекселди база садып апкан. Бо херекселдерниң өртек үнези 200 муңдан өрү болур. А сайгарлыр ажылга бергелер бо-ла таваржып турар, үстүнде хайгаарал албан черлериниң хыналдазы, дериг-херекселди даштыкы чурттардан чагыдарга кызыгаар эртеринге чарыгдалдар дээш оон-даа өске. Бо талазы-биле Ульяна Кечековна хомудалын чугаалап турар.
Ол ышкаш бо ажыл-агыйынга улуг оглу Кежик дузалажып турар. Авашкылар иелээ дыка кызымак, ам мырыңай барааннарын немей кылып чоруп олурарлар. Сөөлүнде арбай далганын, оон шайын (Ава шайы дээр) база бүдүре бергени онза. Чоннуң аразында “Тыва мороженое, тыва шоколад, ам болза тыва шай...” мынчаар-ла чугаалажып турары солун. А тыва мороженоени “Инмарка” деп улуг компания-биле дугурушкаш, ынаар чорудуп турарлар. Тыва мороженоени Сибирьниң хоорайларында садыгларда сада берген. Тываның барааннары Россияның хоорайларынче үндүр саартынып турар-дыр.
Оон ыңай чугула демдеглээри болза, Ульяна Ооржак бүдүрүлгезинде он ажыг кижини ажыл-биле хандырып келген. Оларның аразында кадыының байдалы-биле үнү чок улузувус база бар. “Бо улузум ажылга дыка кызымак, шынчы-даа, шыңгыы-даа чорду...” деп, Ульяна Кечековна ажылчыннарын мактап чугаалады. Национал аъш-чем болбаазырадыр бүдүрүлгениң ажылы шагда-ла көскү бооп турар база шуудай берген, эки талаже эргилип, хөгжүп турар.
Ася Түлүш.
