Декабрь 11-де 19 шак үезинде Тожу кожууннуң эрге-хоойлу камгалаар органнарынга Кызыл-Даштыгда мөөң чыдымның девискээринге руда буступ дүшкениниң дугайында дыңнадыг келген, ук озал-ондактың түңнелинде бүдүрүлге чериниң бир ажылчыны амы-тынындан чарылган. Бустуушкун болуп турда, чер адааның уургайынга 5 ажылчын турган, когараан бир кижиден аңгыда, өске артканнары бертиниг-балыгланыышкынны албаан. Болуушкуннуң соонда уургайга турган ажылчыннарны чер кырынче көдүрген.
Амгы үеде амы-тынындан чарылган ажылчынның өлүмүнүң чылдагаанын тодарадыры-биле истелге эргелелиниң криминалист истекчизиниң киржилгези-биле суд-медицина шинчилелин чорудуп, бүдүрүлге чериниң удуртулгазының талазындан күш-ажыл болгаш ооң айыыл-чок чоруунуң сагылгазының талазы-биле кандыг хемчеглерни ап чорудуп турганын хынап турар. Хыналданың түңнелдерин барымдаалап, оон ыңайгы чорудулга шиитпири хүлээп алдынар.
А.ХЕРТЕК белеткээн.
