Хоорай иштинге халас халдыр
Люксембург деп бичии күрүнеде пассажирлер акша төлевес.
Чурттакчылар болгаш туристер ниитиниң транспортунга халас чоруп эгелээн делегейде бир дугаар чурт Люксембург апарган. Ындыг-даа болза, демир-орук-биле бирги класстың аян-чоруун кылыры болгаш дүнеки автобус рейстериниң чамдыктары төлевирлиг хевээр арткан дээрзин DV дыңнаткан.
Мооң мурнунда ындыг хемчеглерни чамдык хоорайларга хамаарыштыр база ап чорудуп турган болза, а бүдүн чурттуң девискээринге мону бир дугаар нептередип эгелээни бо. Эстонияның төвү Таллинде чүгле тус черниң чурттакчыларын 2013 чылдан эгелеп автобуска чорааны дээш төлевирден хостаан. 2018 чылдан эгелеп 200 муң чурттакчылыг француз Дюнкеркке автобустарга болгаш трамвайларга халас чоруурун ажыглалче киирген.
Ниитиниң транспортунга халас чоруур эрге чоннуң барык 40 хуузунга хамааржыр. Орукка чоруурда, пассажирлер бодун шынзыткан документилерни ыяап ап чоруурун чурумчуткан. Төөгүлүг хүннү Люксембургтуң дөрт вокзалынга концерттер болгаш өске-даа культурлуг хемчеглер-биле демдеглээн. Бо көстүп көрбээн социал хемчегниң дузазы-биле Люксембургтуң эрге-чагыргазы оруктарда тырылган транспорт шимчээшкинин база орук озал-ондаа болур таварылгаларны элээн кызырыптарынга идегеп турар. Хүннүң-не бо чуртче кожазында Бельгия, Германия болгаш Франциядан 200 муң хире чурттакчылар ажылдаары-биле кээп турар.
Ниитиниң транспортунга халас чоруур арганы тургусканы-биле бир чыл дургузунда немелде чарыгдалдарга херек 41 млн. евро акшаны үндүрүг чыылдаларындан алырын доктааткан.
Люксембургтуң шөлүнүң хемчээли 2590 дөрбелчин километрге дең болза, ол Москваның девискээринден чүгле 79 дөрбелчин километр делгем бооп турар. Чурттуң чурттакчы чонунуң саны 607 муң кижи. Ол хиреде автомашина ээлериниң саны-биле Европада бирги черде турар: муң чурттакчыга онааштыр 650 машина хамааржыр.
Коронавирустан камгалаар «эм» дээш хорананган
Иранның мурнуу-барыын талазында Хузестан деп суурунга коронавирустан камгаланыры-биле меге арага ижип тургаш - 20, Тегерандан ырак эвесте Альборз деп суурдан 7 чурттакчы метилдиг спирт ишкеш, хораннанып өлген.
Сирияның эрге-чагыргазы чуртта коронавирустуң өөскүп турарын барымдаалааш, профилактика ажылдарын күштелдирери-биле, грипптиң вирустарындан камгаланып, эът-кежин метилдиг спирт-биле аштап-арыглаарынга ажыглаары-биле ооң бүдүрүлгезин көвүдеткен. Метанолду иран садыгларда хостуг садып турар. Ону ижер суксундан ылгалдыг — кызыл-сарыг өңнүг кылдыр үндүрүп, садып турар.
Кижиниң эът-кежинге дезинфекция болурундан аңгыда, коронавирустан эм болур чадавас дээш, чок болган кижилер ону ишкен түңнелинде, хораннанган.
Иранда коронавирустан аараан 7161 таварылга илереттинген, оларның аразындан 237 кижи чок болган, барык 2,4 муңу аарыгдан эттинген.
Бүгү-делегейниң кадык камгалал организациязы болгаш Россияның Кадык камгалал яамызы коронавирустан камгаланыр дизе, арага ижер деп меге билиишкиннерни хоозун чүүл-дүр деп, шагда-ла тайылбырлаан.
Фронтучуга автобус доктаамын белекке берген
Прибайкальениң баштыңы Игорь Кобзев Ада-чурттуң Улуг дайынының киржикчизи Алексей Новопашинге Тиилелгениң 75 чылынга тураскааткан медальды тыпсыры-биле ооң бажыңынга аалдап чорааш, ооң чагыын күүсеткен.
Алексей Новопашин регионнуң удуртукчузунга Куду суурну таварып эртип турар орукка, автобус доктаар черни тургузуп бээрин дилээн турган. Суурнуң чурттакчылары хоорай чоруурда, кожазында Хомутово деп суурже баргаш, оон тура чоруур турган. Ам хоочуннуң бажыңындан каш-ла метр ырак эвес черде автобус доктаар черни тургускан. Ол «белекти» Алексей Новопашин бодунуң 100 дугаар төрүттүнген хүнүнде ап турары бо. Ол ышкаш регионнуң баштыңы хүндүлүг хоочунга губернатор шагын белекке берген.
Чаа автобус доктаар черни чон «Алексей Иванович аттыг доктаам» деп адай берген.
Алена Лагбы очулдурган.#Шын
