Тыва көрүкчү, дыңнакчы-биле алызындан таныш – 2017 чылда «Үстүү-Хүрээ» фестивалының эң эки бөлүү деп атка төлептиг болган «Отель Кали» бөлүүнүң март 14-те Тываның күрүне филармониязынга концерти болган. Краснояржыларның «чонче бирги үнүүшкүнү» эки эрткенин удуртукчузу Александр Молтянский өөрүшкү-биле демдеглээн.
6 чыл бурунгаар чыглып келген бөлүк, күүселдези кончуг берге бразил джаз, босса-нова хөгжүм хевирлерин ойнап турар. Эрткен чүс чылдың 50-60 чылдарында босса-нованың тургузукчузу Антониу Карлос Жобинниң эгелеп кааны хөгжүмүн А. Молтянский изиг Бразилиядан ыракта Сибирьге эки деңнелге ойнап, ырыларын Татьяна Пугачева күүседип турар. Тыва көрүкчү оларның хөгжүм херекселдеринге күүседикчи мергежилиниң бедиин, арыын эскерген. База катап демдеглеп каалыңар, бо хөгжүмнү күүседири берге. Маңаа улуг мергежил, тускай хөөн херек. Шимченгир самбаны безин күүседип тура, латин-американ кудараашкын аяннарын киирип турары кайгамчык.
Кожавыста Красноярскиден «Отель Калиниң» Тывада эш-өөрү хөй. Бо концертке безин соктаар херекселдер-биле Найыс Дулуш, Евгений Ткачев дузалашканнар. Концерттээр улуг ажылын безин олар Кызылдан эгелеп алганы анаа эвес. Жобинниң эң билдингир «Ипанемадан кыс» деп ырызын көрүкчү сандайында орган бөлүктүң чоок эжи, тыва рокчу Владимир Симчиттиң ынак ырызы деп чарлап, ырлап бергеннер. Боттарының ээлчээнде, бөлүктүң удуртукчузу, базыткыыштыг херекселдер ойнакчызы А. Молтянский эрткен чылын бистиң хөгжүмчүлеривис Универсиадага концерт көргүзүп турда, базыткыыштыг херекселди (синтезатор) боду сөөртүп эккеп берип, дузалаан.
А. Молтянский (базыткыыштыг херекселдер, мелодион, бөлүктүң удуртукчузу), Татьяна Пугачева (ыраажы), Андрей Хитрин (бас-гитара), Василий Екимов (гитара), Евгений Мануйленко (флейта, саксофон) тыва көрүкчүлерге база катап өөрүп четтириишкинин илередип, улаштыр ажылдаарынга көдүрлүүшкүннүг идигни алдывыс деп чугаалап турганнар.
Көрүкчүлер Валерий Халилов аттыг Тывкүрфилармонияның аңгы-аңгы угланыышкыннарлыг эки деңнелдиг хөгжүмчүлерни чалап турарынга өөрүп, деткип турарлар. Шынап-ла, филармонияның көрүкчүзү өскелерден аңгыланып, көргүзүг төнерге-ле, кижи базып каа дег, тон азар черже маңнап-ла кагбас, хөгжүмчүлер ам чүнү чугаалаар ирги дээнзиг, оожум- топтуг тарап, аразында кезек чугаалажып тура тараарлар. Олар хүнден хүнче бир-ийилеп немежип, академиктиг болгаш хөгжүмнүң өске-даа эки деңнелдиг хевирлеринге езулуг бердинген кижилерни, аяннажылганы дыңнап, сеткилин чырыдып алыр дээн эвилелдеп турарлар.
Бистиң корр.
А. Хомушкунуң фоточуруктары. #Шын
