Кожа-хелбээ чоннар-биле харылзаа
Тыва-биле кызыгаарлаттынып чыдар Тунка районнуң Аршан суурунга бурят чоннуң «Алтан-Мундарга» деп национал оюнунуң IV фестивалы болуп эрткен. Бурун чоннарның спортунуң бир хевири – хендирбе сый шаварынга Бурятиядан аңгыда Забайкалье, Иркутск облазы, Тыва, Моол, Кыдат болгаш Кыргыс республикалардан 500 ажыг аалчылар кээп, киришкен.
Тываның төлээлери 20-30 харлыглар аразынга Макар Ынаалай 9-ку чадага чедир ойнаан, Айдыс Кыргыс 8-ке четкен, а 30-40 назы-харлыглар аразынга Аяс Өнер 6-гы чадага четкен. Тевек оюнунга Отчугаш Хомушку 853 катап тепкеш, чемпионнаан. Ол Кызылга болган Шагаа байырлалынга тевек маргылдаазынга 2 муң ажыр тепкен. Буряттарның тевээ бистен арай өске болганы-биле эптешпейн барган.
Кысказы-биле түңнээр болза, «Алтан-Мундарга» деп маргылдааның тиилекчизи Жалсып Манзаров оюн үезинде 22 хендирбе сөөгүн болгаш кол шаңналы – 7 харлыг теве хендирбезин сый шапкаш, Улан-Удэ хоорайга квартираны чаалап алган.
А эрткен чылдың тиилекчизи лама башкы Руслан Сантуев япон автомашина олчалыг болган, бо чылын ол ийи дугаар черни ээлээн.
«Жалсып Манзаров маргылдаага киржир деп-даа бодаваан, шииткекчилерге дуза кадып, делегей чергелиг маргылдааны бедик деңнелге эрттирер күзели-биле, төрээн чериниң адын сыкпас дээш хондур удувайн, стол, сандайлар дажып, дыш чок чоруп турган оол бо-дур» деп, чаңгыс чер-чурттуглары Хойто-Гол сумузунуң чону кайгап ханмайн, тиилекчини деткип, аажок өөрүп турарлар.
Тываның төлээлериниң маргылдаага киржип чораанының дугайында чугаа, «Шын» солуннуң редакциязынга дорт эфирге март 12-де болуп эртер.
(Түңнел оюннуң видеозун көөр дээр болза, телефоннуң камеразын бо QR-кодче угландыргаш, кире бээр).
Бистиң корр. #Шын
