“Даңгына биле Тажы” мөөрей
Шагаан-Арыг хоорайга республиканың ортумак өөредилге черлериниң сургуулдарының аразынга “Даңгына биле Тажы-2020» деп чараш мөөрей болуп эрткен. Аңаа 11 чараш кыстар база 11 экер-эрес, талантылыг оолдар киришкен.
Киржикчилер 6 аңгы шылгалдага мөөрейлешкен: ниити танцы, национал костюм, талантылар мөөрейи (бодунуң мергежилин таныштырары), Ат-алдарның болгаш сактыышкынның чылынга тураскааткан авангард, күш-шыдалының сайзыраңгайы, кежээки каас хеп.
«Ай-Хүн херелдиг алдын Дангына» деп дээди атка Тываның көдээ ажыл-агый техникумунуң сургуулу Оялана Донгак төлептиг болган. Оолдар аразындан «Дээди Тажы» — Балгазында Тываның аграрлыг ажыл-агый техникумундан Чойган Седип тергиидээн.
Киржикчи бүрүзү шаңнал чок артпаан – “Ай херелдиг мөңгүн Даңгына”, “Тергиин Тажы”, “Хүн херелдиг хүлер Даңгына”, “Тулган Тажы”, “Сөс-биле сөглеп четпес Даңгына”, “Ада-угун алдаржыткан Тажы”, «Уян ырылыг Даңгына» «Ук-төөгүзүн кагбайн чоруур Тажы» дээш өске-даа чараш аттарны тывыскан.
Аныяк-өскенниң эстетиктиг база мөзү-шынар кижизидилгезин сайзырадыр, оларның дыштанылгазын организастаар сорулгалыг эрттирген мөөрейни ТР-ниң Өөредилге болгаш эртем яамызы, Шагаан-Арыг хоорайның чагыргазы, Төлээлекчилер хуралы база Кызыл болгаш Шагаан-Арыг хоорайларның хуу сайгарлыкчылары деткээн.
Бистиң корр. #Шын
