Тываның кадык камгалал сайыды Анатолий Югай эрткен хонукта COVID-19-тан аараан 18 таварылга бүрүткеттингенин дыңнаткан. А аарыгны аар эртип турар кижилерниң саны кызырылбаан. Бөгүн ындыг байдалдыг 77 кижи бар. Кызылдың стационар эмнелгелеринде 258 аарыг кижиниң 227-зиниң аарын лаборатория бадыткаан. 25 бичии уруг болгаш 10 иштиг херээжен оларның санында. 20 аарыг кижи ИВЛ аппарады-биле тынып чыдар.
Коронавирустуң чаа хевири – омикрон халдавырын нептеретпези-биле, таарымчалыг эвес чурттардан келген кижилерни аңгылаар обсерваторну аалчылар бажыңнарының баазазынга ажыдарын кадык камгалал сайыды дыңнаткан. Чаа чыл болгаш дыштанылгалар бүдүүзүнде студентилерниң болгаш аалчыларның келирин манап турар бис, ынчангаш келген кижилерни дүрген аңгылап, чыттырарынга белен болур херек деп, Тываның Баштыңы Владислав Ховалыг демдеглээн.
«Буян-Бадыргы» азы «Мөңгүлек» аалчылар бажыңнарының баазазынга обсерваторну ажыдар. Өрээлдерни тускайлап дериир чарыгдалдарны хандырарын Саң-хөө яамызынга онааган.
Ол ышкаш ОРВИ база грипптен аарыыр чоруктар саны көвүдээнин Анатолий Югай дамчыткан. Эрткен неделяда 4476 чорук бүрүткеттинген, 10 муң чурттакчы чонга онааштыр 136,7 кижи, азы эпидемиологтуг көргүзүгге 10,5 хуу четпес.
Республиканың кол санитар эмчизи Людмила Салчак ол медээни бадыткаан, бо хүнде өөредилге организацияларынга грипп дээш кызыгаарлаан хемчеглер киирери болдунмас деп айыткан. Класстарда азы бөлүктерде уругларның 20 хуузу грипптээш келбейн турар болза, ынчан тус черде удуртукчулар карантинни киирип болурун Л. Салчак сагындырган.
Бөгүн 13396 өөреникчилиг 23 школада класстар айыттынган чылдагаан-биле карантинде.
Декабрь 12-ниң хүнү-биле алырга, 1130 өөреникчилиг 54 класс, 322 чаштарлыг 15 садтар бөлүктери, ортумак тускай болгаш өөредилге черлериниң 219 студентилиг 8 бөлүү коронавирус дээш бот-аңгылаашкынче кирген.
Тываның Чазааның парлалга албаны.
#Тываныңчазааныңпарлалгаалбаны #Коронавирус #Кадыккамгалаляамызы #Тыва #Тува #Шынсолун #Тывадыл #Тывамедээ #Tuva #Shyntuva
