2014 чылда, Тываның Россия-биле демнежилгезиниң болгаш найысылал Кызылдың 100 чыл оюн демдеглээн чылда, Кызылдың Президентиниң кадет училищези ажыттынган.
Чеди чыл бурунгаар сентябрьда найысылалдың мурнуу чүгүнге туттунган училище чүгле Тываның эвес, а бүгү Россияның эң-не чараш болгаш төлептиг өөредилге черлериниң бирээзи апарган. Республиканың чону ук училищени тургузарынга улуг деткимчени көргүскени дээш РФ-тиң камгалал сайыды, Россияның Маадыры чаңгыс чер-чурттуу Сергей Шойгуга өөрүп четтирип, чоргаарланып чоруур.
Регионнуң эң-не шыырак эртем-билиглиг башкылары болгаш кижизидикчилери ол училищеде ажылдап турар. Училищениң аудиториялары, лабораториялары болгаш өөренир класстары амгы үениң дериг-херекселдери-биле бүрүн дериттинген. Ук өөредилге чериниң доозукчуларының билииниң шынары эки болганындан дээди өөредилге черлеринче улуг шаптараазыннар чокка кирип ап турар. 2020-2021 өөредилге чылында 11 дугаар классты ниитизи-биле 59 кадет дооскаш, кижи бүрүзү дээди өөредилге черинче кирип алганы онзагай болуушкун.
Сундуй Монгуш училищени чүгле «5» демдектерге дооскаш, С.М. Киров аттыг Шериг-эмчи академиязынче кирип алган. Сундуй химия эртеминде күрүне шылгалдазын 99 баллга дужааган. Рейтинг талазы-биле ол баштайгыларның санында.
Оон ыңай училищени чүгле «5» демдектерге дооскан уругларны база онзагайлап демдеглеп болур. Ол дээрге Айдаш Аракчаа математика эртеминде күрүне шылгалдазын – 100, орус дылды – 92, физиканы – 91 баллга дужаап алган. А Долаан Сарыглар математиканы – 94, орус дылды – 92, физиканы – 91 баллга бижээн. Отчугаш Монгуш математиканы – 94, орус дылды – 94, физиканы – 91 баллдарга дужааган. Олар шупту онзагай хевирниң аттестаттарын холга алган.
Россияның федералдыг камгалал албанының академиязынче Айдаш Аракчаа, Долаан Сарыглар, Мөңгүн-Даш Шомбул кирип алгаш, курсант болуп, даңгырак бээринге белен. Москва хоорайда «Экономиканың дээди школазы» национал шинчилелдер университединче Отчугаш Монгуш кирип алган.
Кадеттерниң аразында Новосибирскиниң эмчи күрүне университединче, Иркутск хоорайда Россияның күрүнениң дээди шииткел университединче, Красноярск хоорайда Сибирьниң федералдыг университединче, Тываның күрүне университединче дээш, шериг албан-хүлээлгезинге хамаарышпас, өске дээди өөредилге черинче кирип алган доозукчулар база бар.
Кызылдың Президентиниң кадет училищезиниң 2020-2021 чылдың доозукчулары дээди өөредилге черлеринче кирип алганы ада-иезинге, башкыларынга, тыва чонунга улуг чоргаарал. Олар кирип алганы өөредилге черлерин чедиишкинниг доозуп алгаш, төрээн чуртунуң төлептиг хамаатылары, специалистери болур дээрзинге идегеливис улуг.
Дараазында үндүрүлгеде ук училищениң доозукчуларының дугайында солун материалдарны номчуур силер, эргим номчукчу.
Айдың ОНДАР.
#Кызылдыңпрезидентиниңкадетучилищези #Өөредилге #Сергейшойгу #Тыва #Тува #Тувамедиагрупп #Тывадыл #Тывамедээ #Tuva #Shyntuva
