Республиканыӊ 34 эмнелгелеринде компьютерлерни, техниктиг дерилгелерни чаарткан.
Информация талазы-биле айыыл чок чоруктуӊ негелделеринге дүүштүр эмчи организацияларында 1701 ажылдаар черни автоматчыткан чаӊгыс аай информастыг системага кожуп турарын Тываныӊ Кадык камгалал яамызы дыӊнаткан. Тываныӊ девискээринге эмчи ачы-дузазын чедирер системаны чурагайжыдып турар.
«Күрүнениӊ кадык камгалалыныӊ чаӊгыс аай информастыг системазынга даянып, кадык камгалалыныӊ чаӊгыс аай чурагайлыг дөзевилелин тургузары» регионалдыг төлевилелди боттандырып турар. Ол «Кадык камгалалы» национал төлевилелге хамааржыр.
2019 чылда автоматчыткан 610, а 2020 чылда 1642 ажылчын олутту хувааган.
2020 чылда 27 фельдшер-акушер пунктуларын туткаш, ажылдаар черинге компьютер, интернет кожуп, автоматчыдып каан.
2019 чылда – 21, а 2020 чылда 33 фельдшер-акушер пунктулары
дүрген ажылдаар интернеттиг апарган. 2021 чылда ам-даа 35 ФАП-тарга интернет кожары планнаттынган.
Республикада электроннуг эмчи документилериниӊ реестрин ай санында долдуруп турар. 2020 чылдыӊ майда Тываныӊ эмчи-социал экспертизазыныӊ кол бюрозунче пациентилерниӊ документилерин ол реестр таварыштыр чорудуп эгелээн. Ынчангаш пациентилер ам херек шынзылгаларын боттары баргаш, бижидип ап турбас апарган.
Бо чылдыӊ апрельден тура эмнерниӊ рецептизин электроннуг хевирде бижип турар. Аарыг кижиге эм-таӊ айтып берген документини электроннуг хевирге бижээш, РМИАС автоматчыткан системаже киириптерге, аптека албан черинге ону дамчыдар. Чиигелделиг эм алыр пациентилер чүгле паспортун тудуп алгаш, аптекага чеде бээр.
«Пациентилерге болгаш эмчилерге электроннуг сервисти ажыглалга киирери эмчи организациязынга эӊ эки шиитпирлерни тып, ажылын чурумчулдарынга эптиг болур» - деп, Идегел Монгуш, Тыва Республиканыӊ Эмчиниӊ информация-аналитиктиг төвүнүӊ директорунуӊ оралакчызы тайылбырлаан.
Россияныӊ кадык камгалал яамызы ук төлевилелдиӊ планы ёзугаар 2021 чылдыӊ октябрьдан тура, чүрек-дамыр, ыжык аарыглыг пациентилерге эмчи дузазын чедирер талазы-биле холушкак эмчи информастыг системаны ажыглалга киирер. Аарыг улусту «Наблюдайся», «Контроль за лечением» деп модульдарга кожуптарга, эмнээшкинниӊ канчаар чоруп турарын боттары көрүп болур апаар.
#ТР_ниңкадыккамгалаляамызы #Националтөлевилел #Кадыкшыл #Шынсолун #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
