Эпидбайдал
Чазактың бөгүнгү Аппарат хуралы Росхереглелхайгааралдың Тывада эргелелиниң удуртукчузу Людмила Салчактың республикада эпидемиологтуг байдал дугайында илеткели-биле эгелээн.
- Амгы үеде республиканың девискээринде коронавирус халдавырлыг аарыг чавырлып турар, байдалды өй-тавында деп көрүп болур. Ындыг-даа болза бир хонуктуң көргүзүү ортумак российжи көргүзүгнү 1,5 катап ажып турар. Эрткен неделяда халдавырлыг аарыгдан аараан 453 кижи бүрүткеткен. Хамчыктыг аарыг чыпшынган улустуң хөй кезии Кызыл хоорайда, Тес-Хем, Мөңгүн-Тайга, Сүт-Хөл, Чаа-Хөл кожууннарда.
Школа назыны четпээн уруглар болгаш пенсия назылыг улустуң аразында аарыгның көвүдеп турары билдинген. Амгы үеде Кызыл хоорайның 12 дугаар, Ак-Довурак хоорайның 3 дугаар школазын бот-изоляция чурумун сагыыр кылдыр чорудупкан.
Республикада вакцинаның ийи дугаар кезээ-биле чурттакчыларның 64,7 хуузу тарытканын демдеглээш, октябрь 1-ге чедир вакцинацияның 80 хуу көргүзүүн чедип алыр дээрзин Л. К. Салчак сагындырып чугаалаан.
Республиканың кол санитар эмчизи ук байдалды барымдаалап, хөй-ниити чемненилге черлерин 50 хуу долдурбушаан, ажылдап эгелээрин чөпшээреп болур дээрзин саналдаан. Ол ышкаш хөй-ниити чемненилге черлериниң ажылдакчыларының 100 хуузу тарыдып алган, ажылдаар черинге дезинфекция, санитарлыг арыглаашкын кылган соонда, ажылдап болур деп кол негелде турарын Л. К. Салчак сагындырган.
Р. ДЕМЧИК ажылдаан.
#Тывареспубликаныңчазаа #Аппаратхуралы #Росхереглелхайгаарал #Эпидбайдал #Тыва #Тува #Тувамедиагрупп #Тывадыл #Тывамедээ #Tuva #Shyntuva
