Тыва Республиканың Перинаталдыг төвүнүң эмчилери февраль 22-де эң-не бичии килдиг төрүттүнген чашты менди-чаагай эмелгеден үндүр бижээн.
Республиканың төөгүзүнде бир дугаар таварылга - 480 грамм төрүттүнген чашты камалап артырып алыры-биле эмчилер бүгү күжениишкиннерни үндүрген түңнелинде, чаш чоорту доругуп, 2 кил 800 грамм четкенде, ону эмнелгеден үндүр бижээн.
Перинаталдыг төптүң чаа төрүттүнген чаштарның реанимация болгаш күжениишкинниг терапия салбырының эргелекчизи Владимир Демчик ынчан берге байдалдыг чашты хүлээп алгаш, болдунар-ла бүгү аргаларны ажыглап, эмчи дузазын чедирген. Ол үеде хуусаадан эрте төрүттүнген чаштың берге байдалында ышкаш, шак-ла ындыг берге байдалга эмчилер таваржып, чаштың кижи болуру кандыг-ла ирги дээн бодалдарны баш бурунгаар чугаалаарындан кым-даа дидинмейн турган. Ынчалза-даа чаш төлге дуза кадары-биле эмчилерниң талазындан кылыр ужурлуг бүгү-ле ажылды күжениишкинниг чорудуп турганнар.
Хамыктың ужуру, аваның кадыының байдалы нарын болганы-биле ижин иштинге турда-ла, чаштың кадык төрүттүнеринге айыыл тургустунуп келген. Ынчангаш уруг ижин иштинге чаа-ла 27 неделя болуп турда, аваны-даа, чашты-даа камгалап алыр сорулганы салгаш, эмчилер чаштың эрте төрүттүнери чугула деп шиитпирни хүлээген соонда, 480 килдиг кыс төрүттүнген.
Бо хүнде 2 кил 800 грамм чедир доругуп келген кысчыгаштың кадыы эки байдалда. Улаштыр ооң кадык өзүп, сайзыраары бүрүнү-биле ада-иезиниң харыысалгазында. Эмчилерниң берген сүмелерин улаштыр шыңгыы сагып, бичии-даа хажыдыышкын чок күүседир болза, бичии чаш өске өөрүнден тудак чок өзүп, доругуп келир.
Перинаталдыг төптүң коллективи ховар пациентизин эмнелгеден үндүр бижип, бажыңынче үдеп тура, ооң ада-иезинге аас-кежикти күзеп, чаптанчыг кызын кадык-чаагай доруктуруп алырын күзээн. Аас-кежиктиг аныяк ада-ие төптүң мурнундан колясканы, чаа төрүттүнген чашка чугула херек бүрүнү-биле белеткеп каан чараш комплектини белекке алганнар.
Бист.корр.
Кадык камгалал яамызының медээзи
Чуруктарны яамының сайтызындан алган.
