Август 24-тен эгелеп хөй-ниити чемненилге черлеринден аңгыда, парктар, музейлер, ном саңнары болгаш хөлдер чанының дыштанылга черлеринге кызыгаарлаашкынныг хемчеглерни кошкаткан дугайында медээни ТР-ниң Чазак Баштыңының оралакчызының хүлээлгезин күүседип турар Айдыс Сат журналистерге дыңнаткан.
Ол кызыгаарлаашкыннар херек кырында хөй кижи чыглыр черлерниң олуттарының 25 хуузунга чедир долдуруп болурун чөпшээрээн болуп турар. Оларның аразында банкет залдары, рестораннар болгаш куда-дой, юбилейлер демдеглээр черлерде ам-даа кызыгаарлаашкын уламчылавышаан. Ынчап кээрге, массалыг хемчеглер, ол ышкаш өг-бүле байырлалдарын эрттиреринге ам-даа чөпшээрел бербээн. Хөй-ниитиниң чемненилге черлери столовая, кафелерге эртенгиниң 6.00 шактан кежээкиниң 23.00 шакка чедир ажылдаарын чөпшээрээн. Ындыг черлерге 25 хуудан хөй чон чыылбас ужурлуг.
Республика девискээринде аян-чорук кылып келген аалчыларга август 24-тен эгелеп “Алдын-Булак” болгаш “Азияның төвү” этнокультурлуг комплекстер эжиктерин ажыдар. Росхереглелхайгааралдың Тывада эргелелиниң эпидемиологтуг хайгаарал килдизиниң начальнигиниң оралакчызы Любовь Дармажаа хөй-ниитиниң чемненилге черлериниң ээлери, ында ажылдап турар ажылдакчылары 100 хуу тарыткан болза, чүгле ынчан залдарын 50 хуу чедир олуртуп, ажылдап болур дээрзин дыңнаткан.
Бо хүнде Россия деңнели-биле алырга, коронавирустан аараан улус саны-биле Тыва беш дугаар черже бадып келген болуп турар. Аарыг чавырлып турар-даа болза, серемчилелди кошкаткан ажыы чок. Кызыгаарлаашкыннарны чоорту кошкадыры көрдүнген.
Карина МОНГУШ.
#Росхереглелхайгаарал #ТР_ниңэкономикаяамызы #Кызыгаарлаашкыннар #Тыва #Тува #Тувамедиагрупп #Тывадыл #Тывамедээ #Tuva #Shyntuva
