Республика девискээринде Covid-19 хамчыктыг аарыгның өөскүп турар үезинде дүрген дуза чедирер бригадаларның ажылы көвүдээн болгаш, чамдыкта аарыг улустуң шыжыккан аажы-чаңын-даа шыдажып, келген кыйгыртылга бүрүзүнче четтигери-биле кончуг дүрген ажылдаар дээш кызыдып турар.
Бир хүнде Республиканың эмчиниң дүрген дуза чедирер төвүнге 600 чедир кыйгыртыглар кээп турар. Оларның аразында 170-200 чүгле коронавирустан аараан улустарның кыйгыртылгалары. Онза байдал режиминде ажылдап турар дүрген дуза чедирер бригадаларга биоматериалдар алыр даалганы база берген. Ол угланыышкын-биле ажылдың хемчээлин көөр чүве болза, ортумаа-биле бир хүнде 40-тен хөй кижи болуп турар база ол хире кижини КТ-шинчилгезин эрттери-биле эмчи албан черлеринче чедирип турар.
Дүрген дуза чедирилгезиниң шынарын бедидер сорулга-биле Айыыл-халап медициназы биле эмчиниң дүрген дуза чедирилгезиниң төвүнде медээ хүлээп алыр немелде дөрт каналды кошкан. Ол дээрге 103 болгаш ийи каналды 112 чаңгыс аай дугаарда кошкан. Бир хүнде бригадаларның үнүүшкүнү анаа хүннерде 14-тен хөй турган болза, онза байдал режиминде 20 чедип турар.
Республиканың эмчиниң дүрген дуза чедирер төвүнүң улуг эмчизи Шолбан Сарыгларның дыңнадып турары-биле, улус болганчок-ла поликлиникаларның далаштыг (экстренная) дүрген дуза чедирер албаны-биле дүрген (скорая) дуза чедирер станцияны салчай бээр болуп турар. Бир дугаар оочурда, кижиниң амы-тынынга айыыл тургустунуп келгенде далаштыг (экстренная) дүрген дуза чедирилгези негеттинер.
Дүрген дуза дилээн медээ келген дораан, хүндүскү үеде, диспетчерлер боттары кандыг албанның дузазы негеттинип турарын билип алгаш, чогуур албанның дүрген дуза бригадазын чорудуптар. Ол байдал аарыг улуска катап-катап телефоннар дугаарлары дилеп, үнелиг шак, минутазын чидирбезинге кончуг дузалыг болуп турар. Далаштыг эмчи дузазының албаны 22 шакка чедир ажылдаар. Улаштыр дүрген дуза чедирер станцияның бригадалары кыйгыртылгаларны хүлээп, ажылдаар.
Дүрген дуза чедирер станцияның болгаш айыыл-халап медициназының бригадаларында ажылдап турар специалистер бо хүннерде коронавирустан аарып турар улустуң хүнден-хүнче көвүдеп турарын демдеглеп турар. Халдавырлыг аарыгны чавырылдырар деп бодаар болза, кижи бүрүзү медерелдиг болуп, эпидбайдалда сагыыр ужурлуг санитарлыг негелделерни хажытпайн, хөй кижи чыылган черлерже аргалыг-ла болза барбазын кызыдып, арыг-силигни доктаамал шыңгыы сагыырын эмчилер дилеп турар.
Covid-19 кончуг дүрген чыпшыныычал халдавырлыг аарыг дээрзин утпаза чогуур. Үнгеш-киргеш доктаамал холун чуп, бажыңнарынга-даа, ажылдаар олудунга-даа хүннүң-не дезинфекцияны кылыры чугула деп эмчилер база катап сагындырып турар. Ол ышкаш телефон, компьютерлерни, эжик тудазы, стол, сандай кырын дээш, шупту-ла долгандыр турар чүүлдерни арыг-силигге тударын утпазын чондан дилеп турар.
Кижиниң кадыы чүгле бодундан хамааржыр дээрзин база катап утпаалыңар. Кадык болуңар!
#Коронавирус #Кадыкшыл #Дүргендуза #Тыва #Тува #Тувамедиагрупп #Тывадыл #Тывамедээ #Tuva #Shyntuva
