Россияның газ шыгжамырларын ноябрь айның эгезинде бүрүнү-биле долдуруптар. Бо ажыл доозулган соонда, Россияның газын хереглээр Европа чурттарының газ шыгжамырларын долдуруп эгелээр дугайында айтыышкынны Президент Владимир Путин берген.
Германияның газ рыногунда операторлар “Соңгу агым – 2”-ни Европа чурттарынга садар газты курлавырлап алырынга кончуг ажыктыг хоолай деп санап турар.
📢ШОЙГУНУҢ ХАРЫЫЗЫ
Россияның НАТО (Соңгу атлант дугуржулгазының организациязы) чурттарынга шериг чөңгээлээшкиннерин ядерлиг чепсек-биле чавырылдырып болурунуң дугайында Германияның камгалал сайыды Аннегрет Крамп-Карренбауэрниң чугаазынга Россия Федерациязының камгалал сайыды Сергей Шойгу шыңгыы болгаш тодаргай тайылбыр харыыны берген.
“НАТО кежигүннери Европа чурттарынга Россияның шериг чөңгээлээшкиннери деп хоозун чүүлге чылдагааннап алгаш, Соңгу атлант дугуржулгазының организациязы боттарының чепсектиг күштерин Россияның кызыгаарының чоогунга мөөңнээри Германия биле Европа чурттарынга кандыг уржуктуг болурун Герман Федеративтиг Республиканың амгы камгалал сайыды эки билир ужурлуг – деп, Сергей Шойгу чугаалаан. – Соңгу атлант дугуржулгазының кежигүннери чурттарның айыыл чогу бүгү Европаның айыыл чок чоруу-дур. Ол Россия чокка канчап-даа болдунмас”.
Европаның айыыл чок чоруунуң айтырыгларын чөптүү-биле сайгарып чугаалажырынга НАТО чурттарының удуртукчулары белен эвес дээрзин Германияның камгалал сайыды Аннегрет Крамп-Карренбауэрниң Россияның шериг чөңгээлээшкиннерин ядерлиг чепсек-биле чавырылдырып болурунуң дугайында үндезин чок чугаазы бадыткап турарын база Сергей Шойгу демдеглээн.
📢ТЫВАДАН БЛОГЕРНИҢ ОЮНУ
Нептереңгей GTA San Andreas — GTA Kyzyl City Stories оюннуң уг-шии-биле элээн каш сериялыг оюнну Тывадан блогер үндүргенин Telegram-канал дыңнаткан. Ооң баштайгы сериязы YouTubе-та көстүп келген.
Оюннуң утказы мындыг: арагалаар чоруктан болгаш ажыы чок оюн-тоглаадан хөңнү калгаш, кол маадыр Арсен биле ооң эштери Кызылдан Москваже чоруптар. Орукка олар дээрбечи “сайгарылгаларга” киржип, машиналар оорлап мунуп, өске-даа коргунчуг болуушкуннарга таваржып чоруурлар.
Оюннуң хөгжүм каасталгазынга радиостанцияларның чалгыгларынга дыңналып турар тыва ырыларны болгаш аялгаларны ажыглаан.
Тывадан блогерниң үндүргени оюннуң баштайгы сериязын көрген кижилерниң чамдыызы онзагай чогаадыкчы чүүлдерни оон эскербээнин демдеглээннер.
📢ДАЙЫННЫҢ ХООЧУННАРЫ ТӨЛЭЭР
Россияның либерал-демократтыг партиязындан РФ-тиң Күрүне Думазында депутат Андрей Кузьмин Ада-чурттуң Улуг дайынының киржикчилери хоочуннарны коммунал ачы-дуза төлевирлеринден хостаар дугайында хоойлу төлевилелин Күрүне Думазынга саналдап киирген.
Ол хоойлу төлевилелин Күрүне Думазынга сайгарып чугаалажыр арга чок болган. Чүге дээрге Күрүне Думазының депутаттарының хөй кезии Ада-чурттуң Улуг дайынының киржикчилери хоочуннарны коммунал төлевирлеринден хостаар дугайында хоойлу төлевилелин сайгарып көөрүн деткивейн барган.
Россияның либерал-демократтыг партиязының Күрүне Думазында фракциязындан хоойлу төлевилелин сайгарып чугаалажырын – 20, «Новые Люди» партияның фракциязындан – 12, «Справедливая России – Патриоты – За правду» партиядан – 26, РФКП-ден 53 депутат деткээн. Бо партияларның мурнундан өске депутаттар бадылавааннар.
“Чаңгыс демниг Россия” политиктиг партиядан Күрүне Думазында фракциязының кежигүннериниң хөй кезии база Россияның либерал-демократтыг партиязындан депутат Андрей Кузьминниң киирген төлевилелин РФ-тиң Күрүне Думазынга сайгарып көөрүн деткивээннер.
Ада-чурттуң Улуг дайынының киржикчилери хоочуннарны коммунал төлевирлеринден хостаар дугайында хоойлу төлевилелин бо удаада деткивээнин ында “чиг” чүүлдер бар болганы азы хоойлуну төлевилели-биле ханы таныжып четтикпээни-биле Күрүне Думазының депутаттары тайылбырлааннар.
Ада-чурттуң Улуг дайынының киржикчилери хоочуннар коммунал ачы-дуза төлевирлерин төлевес шиитпирни хүлээп алырынга салдарлыг бооп болур хоойлу төлевилелин Күрдумага сайгарып көөрү соңгаарлаттынган.
РФ-тиң Пенсия фондузунуң медээзи-биле алыр болза, 2020 чылдың февраль 1-де байдал ёзугаар Россияда Ада-чурттуң Улуг дайынының киржикчилери дириг хоочуннарның саны 48 092 кижи, оларның 45 007-зи инвалидтер.
📢ДЕЛЕГЕЙДЕ ЭҢ БАЙ КИЖИ
Paypal, SpaceX, Tesla компанияларның үндезилекчизи Илон Маск делегейде эң бай кижи.
Ооң компаниялары амгы үениң космос системаларының оператору, электри күжү-биле ажылдаар автомобильдерни чогаадып, бүдүрүп үндүрүп турар. Илон Масктың удуртулгазы-биле ажылдап кылган ракета космос кораблин орбитаже чүктеп үндүрүпкеш, Атлант океанга тургускан тускай платформага хонупкан. Ындыг хевирниң ракеталарын каш катап ажыглап болурунуң, космоска чарыгдалдарны эвээжедириниң аргаларын Илон Масктың компаниязы тургускан. 2021 чылда Илон Масктың космос компаниязы тускай корабльге туристерни 500 километр бедик орбитага ужуткаш келген. Ол дээрге чурттар аразының космос станциязының орбитазындан оранчок бедик орбита.
Илон Масктың Tesla компаниязы электри күжү-биле ажылдаар автомобильдерни чогаадып, бүдүрүп үндүрүп турар. Оларның өртээ ам дээрезинде кончуг аар-даа болза, келир үеде ажыглалы нептереңгей автотранспорт апаарының бүгү байдалдары бар.
Амгы үеде Илон Масктың акша-төгерииниң, өнчү-хөреңгизиниң өртээниң ниити түңү – 300 миллиард американ доллар.
(Россияның информация агентилелдериниң ажык медээлеринден).
Шаңгыр-оол МОНГУШ.
