Чаа коронавирус халдавырындан аарыыр чоруктуң эвээжээнин барымдаалааш, Тываның кол санитар эмчизи Людмила Салчак республиканың удуртулгазынче ооң мурнунда киирген кызыгаарлаттынган хемчеглерни чымчадыр азы ап кааптар чаа санал-оналдарны киирген. Хамаатыларның канчаар алдынарынга, сайгарлыкчы чорук, культура, спорт база ачы-дуза адырының объектилериниң ажылынга, амыдырал-хандырылганың шупту адырында ажылды организастаарынга ол хамааржыр. Тыва Республиканың Баштыңының Чарлыынче өскерлиишкиннерни киирип, марттың 14-тен ол ажылдап эгелээр.
Ажык черге, арыг агаарга чорааш, маска кетпейн барып болурун кол санитар эмчи саналдаан. Ындыг-даа болза, хөй-ниити транспортунга чорааш, азы хааглыг хөй-ниити черлеринге масканы кедери албан.
1,5 метр социал дистанцияны сагыыры база күрүне болгаш муниципалдыг албан черлеринге, культура, спорт, хөй-ниитиниң чемненилге объектилеринге, садыг төптеринге, байырлыг бадылажылга езулалынга QR-кодту көргүзери албан эвес.
Уруглар ойнадыр болгаш хөгледир черлер, компьютер залдары, аттракционнарның ойнаар зоналары, ооң иштинде ойнаар батуттар, уругларга база улуг кижилерге немелде өөредилге организациялары, кинотеатрлар, театрлар, театр-концерт база культура-дыштанылга албан черлери, баш таарар черлер, чараштаныр салоннар, дыргак кылыр салоннар, массаж салоннары, спа-салоннар баш бурунгаар бижиткен кижилер-биле ажылдап болурун көрген.
Сауналар, чунар-бажыңнар, хеп чугдурар черлер, химчисткалар, ательелер, фитнес-клубтар, фитнес-залдар, тренажер залдары, күш-культура-кадыкшылга комплекстери, спортчулар белеткенир спорт объектилери, аалчылар бажыңнары, дыштанылга баазалары, турисчи баазалар, эштир бассейннер, доштуг чуңгулар, күрүне болгаш муниципалдыг ачы-дуза көргүзер хөй ажыл-чорудулгалыг төптер, Чонну ажылга хаара тудар төптер, автошколалар бо неделяның бир дугаар хүнүнден ажылдап эгелээр, ол ышкаш конференциялар, делгелгелер база ярмаркаларны организастап болур.
Ындыг болзажок, үстүнде айыттынган объектилер болгаш организациялар профилактиктиг хемчеглерни шыңгыы сагыыр ужурлуг: кирип турар кижилерниң температуразын хынаар, өрээлдерни өйлеп-өйлеп дезинфекциялаар, ажылдакчылары шупту тарыткан азы аарып каапкан ийикпе, чок болза COVID-19-ка антителалары бар деп шынзылга бижиктиг болур.
Росхереглелхайгааралының Тывада эргелелиниң ажылдакчылары, ведомстволар аразының рейд бөлүүнүң кежигүннери профилактиктиг хемчеглерни сагып турарынга хыналдаларны чорудар.
Тываның Экономиктиг хөгжүлде болгаш үлетпүр яамызы сайгарлыкчы чорук субъектилеринге өөредилге семинарларын март 14-тен эгелээр, аңаа Росхереглелхайгааралының ажылдакчыларын киириштирер.
Людмила Салчак өнчүден хамаарылга чокка, кандыг-даа организацияларга коронавирус халдавырындан камгаланырының талазы-биле методиктиг дузаны көргүзеринге ведомство белен дээрзин дыңнаткан.
Марттың 14-тен ажылын катап эгелээр организациялар болгаш хуу сайгарлыкчылар ажыл-чорудулгазын, объектиниң өрээлдерин дезинфекциялаан актызын, ажылдакчыларның санын, ат-сывын, COVID-19-ка удур тарытканын, дезинфекциялаар чүүлдериниң кайы хире барын, СИЗ-терин (ажылдакчыларның маскалары база хол-хаптары), санитайзерлер, агаар арыглаар херекселдери барын Росхереглелхайгааралының Тыва Республикада эргелелиниң электроннуг адрезинче e-mail: mail@17.rospotrebnadzor.ru дыңнадыр.
Тываның Чазааның парлалга албаны.
