Тываның Баштыңы Владислав Ховалыг Москвага ажылчын сургакчылаашкынга чорааш, Россияның саң-хөө сайыдының бирги оралакчызы Леонид Горнин-биле ужуражып, чыл төнчүзүнде шалың төлевириниң айтырыгларын чугаалашкан.
«Бистиң сайгарып чугаалашканывыс айтырыглар белен-селен шиитпир чок айтырыглар-дыр, ынчалзажок бис-даа, РФ-тиң Саң-хөө яамызы-даа чыл төнчүзүнде шупту улус акша-шалыңын долу хемчээлдиг, саадал-үзүктел чок алган турарынга, ону шиитпирлээринге республика акша-хөреңгилиг болурунга сонуургалдыг бис» – деп, социал четкилерде бодунуң блогунга Владислав Ховалыг бижээн.
Ужуражылганың кол темаларының бирээзи болза, регионнуң иштинде ортумак шалыңның бедээни база күш-ажыл төлевириниң эң адаккы хемчээлиниң өскени-биле шалыңның өй-шаанда төлевири болган. Ол ышкаш капитал салыышкыннарга болгаш экономиканың хөгжүлдезинге чарыгдалдарны кадагалап арттырары тоң чугула, чүге дизе күрүнеден дузаламчы ап олурар регионга ук айтырыгларны хандырарынга боттуң орулгаларының темпилери чедишпейн турар.
Мооң ужун Тыва Россияның Саң-хөө яамызы-биле кады регионну акша-хөреңги-биле хандырарының өске механизмнерин дилеп тывар ужурга таваржып турар.
“Шалыңның өй-шаанда төлевиринден база хөгжүлдеге четчир акша-хөреңгилерни үндүрүп бергенинден улус-чоннуң амыдыралының шынары экижиир. Кандыг-даа деңнелдерде ону билип, биске дузалажырын кызыдып турар. Тываның бюджединиң чидиг айтырыгларының шиитпирлээшкини – турум байдалдың база республиканың улам ыңай хөгжүлдезиниң магадылалы-дыр» – деп, Тываның Баштыңы түңнээн.
А. ХЕРТЕК белеткээн.
