Тываның Баштыңының албан-хүлээлгелерин түр үеде күүседип турар Владислав Ховалыг эң берге байдалдыг школаларга бо чайын боду барып четкеш, чогуур айтырыгларын бирден бирээ чокка айтырып, дарый шиитпирлиг даалгаларны берген.
Тес-Хем кожууннуң Самгалдай суурга 1962 чылда туттунган школазынга келгеш, ол школачы чораан үелерин сактып чугаалаан. Ооң ачазы Товарищтай Сарыг-оолович 1978-1981 чылдарда Самагалдай ортумак школазының директору турган. «Дөрт, беш классты маңаа өөренип турган мен. Дөрт класска немец дылга ырлап, шүлүктеп турган бис, дыка бедик деңнелдиг башкы турган» - дээш, Владислав Ховалыг уттундурбас школачы үелерин сактып келген. Химия лабораториязы ол-ла өрээлинде турарын көргеш, ооң-биле болган таварылганы чугаалаан. Ынчан ол школага өөренип турда, аңаа ногаа тарып өстүрер участок турбаан дээрзин Владислав Ховалыг сактып, төрээн школазының чанында тарып олурткан үнүштерни бичии оолдар, уруглар-биле кады суггарып турган. Чайгы дыштанылгазында безин школазының үнүштерин ажаап суггарып турар оолдар, уругларны «Эр-хейлер!» деп мактаан. Самагалдайның 1 дугаар ортумак школазының оран-савазын 59 чыл бурунгаар тудуп каан-даа болза, кабинеттерниң дерилгези, соңга-хаалгазын амгы үении-биле кылганын магадаан.
https://vk.com/shyn31081925?z=video360104045_456239220%2F7b4906451a78d083fd%2Fpl_wall_-201111625
Р. Демчик.
