Россия Федерациязының Күрүне Думазының депутаттарының болгаш Тыва Республиканың Баштыңы – Чазааның Даргазының соңгулдаларының үезинде 12 дугаар участок соңгулда комиссиязы Кызылдың № 2 школазында ажылдап турар.
Кызыл хоорайда өске соңгулда участоктарында ышкаш, бо участокта соңгулдалар дыка идепкейлиг чоруп турар. Сентябрь 17 ажыл хүнү болгаш, соңгукчуларның чамдыызы ажылынче далажып, дүрген соңгуп кааптар дээш, соңгулда участогунга 8.00 шак четпээнде четкилеп келгеннер деп, участок соңгулда комиссиязының кежигүннери чугааладылар.
Бо соңгулда участогунда коронавирус аарыгга удур камгалал хемчеглерин баш бурунгаар алганы илдең. Соңгукчулар участокка кээрге, оларның эъдиниң изиин хынап, холдарының дезинфекциязын чорудуп турар.
12 дугаар соңгулда участогунуң девискээринде ниитизи-биле 2000 ажыг соңгукчу бүрүткеткен. Соңгулдаларның баштайгы хүнүнде 8.00 шактан 11.00 шакка чедир, чүгле 2 шак дургузунда, 160 хире соңгукчу баш бурунгаар бадылап каапканын бо участок соңгулда комиссиязының кежигүнү Буян Моңгуш дыңнатты.
Кызылдың 12 дугаар соңгулда участогунга бадылаар деп күрүнениң ачы-дуза системазы дамчыштыр баш бурунгаар чагыгны өске девискээрден киирген соңгукчулар кээрге, оларны күрүнениң автоматтыг системазы бүрүткеп турар – паспортта ат-сывының баштайгы үжүктерин, төрүттүнген чылын парлаптарга-ла, бо участокка соңгуур дээрзи бүрүткеттине бээр, бүрүткел чок кижилер бадылаашкынга киржир аргазы чок деп, Буян Олегович демдегледи.
Бадылаашкынның кандыг чоруп турары 2 видеокамера дамчыштыр хайгааралда. Россия Федерациязының Күрүне Думазының депутаттарының болгаш Тыва Республиканың Баштыңы – Чазааның Даргазының соңгулдаларынга төлээлери киржип турар партияларның хайгааракчылары база соңгулда участогунда бадылаашкынның канчаар чоруп турарын хайгаарап турарлар.
Шаңгыр-оол МОҢГУШ.
#Соңгулдалар #Кызылхоорай #Соңгулдаучастогу #Тыва #Тува #Тувамедиагрупп #Тывадыл #Тывамедээ #Tuva #Shyntuva
