“Кадык камгалалының баштайгы эмчи дузазын чедирер черлерин чаартыр” деп программа-биле Сүт-Хөлдүң төп кожуун эмнелгезиниң лабораториязы «ERBA XL-100» деп биохимиктиг анализтер хынаар чаа технологияның дериг-херекселин алган. Боду ажылдаар бо анализатор бир шак дургузунда 200 тестилерни хынаптар бедик шынарлыг.
Сүт-Хөлдүң төп кожуун эмнелгезиниң улуг эмчизи Лидия Ондар чаа аппараттың камналгалыг талазы кончуг эки дээрзин демдеглээн. Шак бо чаа үениң дериг-херексели-биле ажылдаар специалисти аңгы белеткеп алган болгаш ТР-ниң Кадык камгалал яамызының киржилегези-биле анализаторну хүлээп ап тургаш, бүгү процедураларның шенелдезин эрттирген.
Ниитизи-биле Сүт-Хөл кожуунда 8200 кижи чурттап турар, оларның 3228-зи уруглар. Чылдың-на профилактиктиг эмчи шинчилгези болгаш диспансеризацияны 2300 кижи эртер ужурлуг. Төп кожуун эмнелгезиниң лабораториязынга чылдың-на 40 муң ажыг биохимиктиг лабораторлуг шинчилелдерни чорудуп турар.
