Март 7-де «ТуваДжазБэнд» боттарының херээжен хөгжүмчүлеринге болгаш көрүкчүлерге белек кылдыр «Джазта чүгле мачолар» деп концердин көргүскен. Бэндиниң ыраажызы Соня Кара-оол, хөгжүмчүзү Надежда Дулушту эр коллегалары боодал чечектер, белектер-биле көрүкчүлер аразынга «олурту шаңнааннар».
Академиктиг хөгжүм, джазты сонуургаар көрүкчүлер саны өзүп турарын бо концерт база катап бадыткаан. А джаз үнелекчилери концерттен концертче хөгжүмчүлерниң ойнакчы мергежилиниң өзүп турарын өөрүшкү-биле демдеглеп турарлар. Байырлал бетиниң хүннеринде оюн-тоглаа хемчеглери кайы хөй турзажок, филармонияны шилип алган көрүкчүлерге хөгжүмчүлер мөгейип, сценадан байыр чедиргеннер.
Академиктиг болгаш үрер хөгжүм, джаз дээш ажылдап чоруур хөгжүмчүлерниң байыр чедириишкини солун болган. Көрүкчүлер үр-ле ойнакчыларны салбайн, чаңчыл болган «Полиция участогун» «Бис!» деп кыйгы-биле негеп алгаш, сагыжы ханган тарап чанганнар.
Бистиң корр. #Шын
