ТЫВАНЫҢ БАШТЫҢЫ – ВЛАДИСЛАВ ХОВАЛЫГ

28 сентября 2021

63

Дүжүлгеге саадаан

Бо чылдың сентябрь 17 – 19 хүннерде соңгулдаларга Тывада соңгукчуларның хөй кезииниң деткимчезин алган Владислав Ховалыг Тыва Республиканың Баштыңы – Чазааның Даргазы албан-дужаалга ажылдап киргениниң ёзулалы дүүн, сентябрь 28-те, 15.00 шакта Виктор Көк-оол аттыг национал хөгжүм-шии театрынга болуп эрткен.

Тываның хөгжүм-шии театрының сценазынче Россия Федерациязы биле Тыва Республиканың күрүне туктарын үндүрген соонда Владислав Ховалыг Тыва Республиканың Баштыңы – Чазааның Даргазы албан-дужаалга ажылдап киргениниң ёзулалы эгелээн.

2021 чылдың сентябрь айның 17 – 19 хүннеринде бадылаашкыннарның түңнелдерин Тыва Республиканың Соңгулда комиссиязының даргазы Олег Фортуна дыңнадып, соңгукчуларның хөй кезииниң бадылаашкынын Владислав Ховалыг алгаш, Тыва Республиканың Баштыңы – Чазааның Даргазы албан-дужаалга соңгутканын чарлаан.

Тыва Республиканың Конституциязынга Тыва Республиканың Баштыңы – Чазааның Даргазы Владислав Ховалыг оң холун салгаш, Россия Федерациязының болгаш Тыва Республиканың конституцияларын ыяк сагып, Тываның чонунуң эрге-ажыктары, чаагай чоруу дээш шынчы болгаш ак сеткилдиг ажылдаарын Тыва Республиканың күрүне дылдары орус болгаш тыва дылдарга даңгыраглаан.

Владислав Ховалыг Тыва Республиканың Баштыңы – Чазааның Даргазының даңгыраан берген соонда, бо албан-дужаалдың ылгавыр демдектери Тываның Баштыңының хөрек демдээн болгаш таңманы аңаа тывыскан.

Оларны Владислав Ховалыг хүлээп алгаш, Тываның Баштыңы албан-дужаалга канчаар ажылдаарын, мурнунга кандыг сорулгаларны салганын каксызы-биле чугаалаан. Ооң чугаазының кол утказы — Тываның хөгжүлдези дээш ажылга чонну каттыштырары. “Тарамыктар каттышкаш – күш болур” деп тыва үлегер домакты чугаазынга ол ажыглаан. Владислав Ховалыгның ынчаар чугаалаанында үндезин бар деп болур, чүге дээрге сөөлгү үеде тыва ниитилелде тарамык чоруктуң им-демдээ тыптып келген. Тыва ниитилелди улам сырый каттыштырып болур тура-сорук Тываның Баштыңынга чоннуң соңгааны Владислав Ховалыгда бар дээрзин ооң баштайгы ажыл-херектери бадыткаан.

Тыва Республиканың Баштыңы – Чазааның Даргазының албан-дужаалынга соңгутканы-биле холбаштыр Владислав Ховалыгга Россияның Президентизиниң Сибирь федералдыг округта бүрүн эргелиг төлээзи Вадим Головко байыр чедирип тургаш, "В. Ховалыг ниитилелди улам сырый каттыштырып, хамаатыларның хөй кезииниң бүзүрелин чаалап алган" – деп демдеглээн.

Владислав Ховалыгның Тыва Республиканың Баштыңы – Чазааның Даргазы албан-дужаалга ажылдап киргениниң ёзулалынга күш-ажылдың хоочуннары, республиканың хөгжүлдезинге боттарының улуг үлүүн киирген кижилер чалаттырган. Оларның аразында совет болгаш российжи үелерде Тываның бирги удуртукчулары чораан Григорий Чоодуевич Ширшин, Шериг-оол Дизижикович Ооржак болгаш Шолбан Валерьевич Кара-оол база бар болган.

Республиканың бирги удуртукчузунга чугула херек эртем-билиглиг, ажыл-агыйжы арга-дуржулгалыг Владислав Ховалыгның Тываның Баштыңы албан-дужаалга ажылдап кирипкенин ажыл-агыйга, экономикага, культурага дээш өске-даа адырларга эки талаже өскерилгелер-биле чон холбап турар.