Дүүн, август 31-де, Тываның Баштыңының албан-хүлээлгезин түр үеде күүседип турар Владислав Ховалыг сураглыг мөге Артас Санааны уткуп-хүлээп алганын социал четкилерде бодунуң арынында бижээн.
- Төрээн Тывавыстың төлептиг оглу Артас Санаа тыва кижиниң сыныш дивес бедик тура-соруун Токиога болуп эрткен олимпий оюннарының спортчу шөлүнге көргүзүп кагды. Бүдүн Тыва ооң тиилелгелиг чанып келирин дээш, октаргайже чалбарып турдувус. Ону сен чараш хүрежиң-биле бадыткадың. Ол дээш четтирдивис! Сээң олимпийжи чайынналчак чедиишкинниң дыка хөй оолдарга төлептиг үлегер-чижек апаар деп, дидими-биле чугаалап болур мен. Хүрештиң чажыттарынга өөредип, улуг спортче орукту айтып берген баштайгы тренер-башкың Артур Делгер-оолга четтиргенимни илереттим.
Тыва Республиканың орденин төлептиг оглувус Артас Санаага база ооң бирги башкызы Артур Делгер-оолга «Тыва Республиканың алдарлыг тренери» деп атты бөгүн тывыскан бис.
Тыва чуртувустуң төөгүзүнде алдын үжүктер-биле бижээн чаа арынны ажыткан мөге оглувус Артас Санаага чараш хүрежи-биле олимпийжи аренага ам база девип үнүп кээрин тыва чонумнуң өмүнээзинден күзеп тур мен! Ам-даа тиилелгелерже, бурунгаар!
#Владиславховалыг #Артассанаа #Олимпиада #Ужуражылга #Тыва #Тува #Тувамедиагрупп #Тывадыл #Тывамедээ #Tuva #Shyntuva
