2022 чылда «Эзирлерниң уязы» губернатор төлевилелдиң күүселдези-биле Бора-Тайга, Чыргакы, Элегес, Аксы-Барлык, Бүрен-Аксы, Чаа-Суур, Кызыл-Арыг, Берт-Даг, Кара-Хөл сумуларда болгаш Бии-Хем кожууннуң Найырал арбанда биче спорт залдарының тудуглары чоруп турар. ТР-ниң Спорт яамызы тудуг материалдарын хандырып бээрге, артканын кожуун чагыргалары хүлээнип алган. Тудуг ажылдарын чоннуң күжү-биле кылып турар.
Ниитизи-биле спорт залдарының тудуунче республика бюджединден 23,1 млн рубльди аңгылаан, кожууннарның чарыгдалы 4,0 млн рубль болган.
Ыраккы Мөңгүн-Тайга кожуунда эрткен чылдан тура туттунуп турар спорт залының чарыгдалы хөй болган. Тус чер чагыргазының дыңнадып турары-биле алырга, боттарының бюджединден 797 муң рубльди үндүрген. Чарыгдалдың улуг кезии Кызыл хоорайдан Мугур-Аксы (аразы 400 километр) чедир тудуг материалдары сөөртүр транспорт чарыгдалынче үнген.
Мөңгүн-тайгажылар колдуу шупту ол тудугга киришкен: ажылчын коллективтер, хуу бүдүрүлгелер, сайгарлыкчылар, хуу кижилер. Тудугжуларны изиг чем-биле хандырып турган. Кол удуртулганы кожууннуң спорт школазының коллективи хүлээнип алган.
Бо хүнде Мугур-Аксында спорт школазының тудуу адакталган. Ооң байырлыг ажыдыышкынын бо чылдың сентябрь айда планнап турар.
Сүт-Хөл кожууннуң Бора-Тайга, Таңды кожууннуң Кызыл-Арыг болгаш Чеди-Хөлдүң Элегес сумуларында тудуг объектилери 50 хуу туттунган.
Тудуг ажылдарында база-ла тус чер чурттакчылары киржип турар: албан черлериниң ажылдакчылары, активчилер, аныяктар.
Чыргакыда спорт залының тудуу июнь айда эгелээн. Бо хүнде таваан салган. Тудугда көдээ агитквартиралардан 8 кижилер ээлчежип ажылдап турар. Чоннуң тудуу күзүн доостур.
Биче спорт залдарындан аңгыда, бо чылын Кызыл кожууннуң Кур-Чер суурга база Өвүрнүң Чаа-Суурга ийи модульдуг, ангар хевирниң спорт залдарын тудуп турар.