«УЛУСЧУ КАРТОФЕЛЬ» ГУБЕРНАТОР ТӨЛЕВИЛЕЛИ
Бо хүннерде «Улусчу картофель» губернатор төлевилелиниң киржикчилеринге картофель үрезиннерин үлеп эгелээн. ТР-ниң Күш-ажыл болгаш социал политика яамызының дыңнадып турары-биле алырга, социал деткимчени орулгазы эвээш 11,3 муң өг-бүле алыр. Ниитизи-биле 300 тонна картофельди үлээри планнаттынган. Картофель үрезиннерин Кемерово болгаш Минусинскиниң көдээ ажыл-агыйларындан, тус черниң арат-фермер ажыл-агыйларындан эккээр.
Өг-бүле бүрүзүнге 25 кг картофель болгаш 500 грамм ногаа үрезиннерин бээри көрдүнген. Бир эвес өг-бүледе үштен хөй ажы-төл бар болза, оларның үлүү 50 кил картофель болур. Эрткен чылдарның дуржулгазы-биле алырга, күзүн 100 килден эвээш эвес дүжүт ажаап алырынга бир өг-бүлеге 25 кил картофель чедер болуп турар. А чартык кил ногаа үрезининден 100 кил ажыг ногаа ажаап алыр магадылал бар.
Эрткен чылын эки дүжүт алган өг-бүлелер бо чылын боттары үрезин-биле хандырттынып шыдаптар болганындан социал деткимче алыр өг-бүлелерниң саны кызырлып эгелээн. Эрткен чылын картофель үрезинин садып алырынга чазак-чагырга бюджеттен 9 млн. рубль үндүрүп турган болза, бо чылын оон 1 млн. рубль эвээшти чарыгдап турар.
Чүгле эки дүжүт алганындан бюджет чарыгдалы кызырлып турар эвес, дуза көргүзер деткикчилерни хаара тудары база бюджетке камналгалыг болуп турар. Чижээлээрге, бо чылын «Улусчу картофель» төлевилелге депутаттар, хуу сайгарлыкчылар идепкейлиг каттыжып, 940 өг-бүлеге үрезин-биле дузалаан.
Тываның Баштыңы Владислав Ховалыг кожуун чагырыкчыларынга «Улусчу картофель» төлевилелдиң киржикчилерин эки хайгаараарын дааскан. Өг-бүлелерниң огороду болгаш бажың чанының участоктарының бар-чогун четчелеп, кымга тускай чер аңгылап бээрил дээн чижектиг өске-даа таарымчалыг байдалдарны тургузуп бээр ужурлуг.
/Тываның Чазааның парлалга албаны.
