2023 чылдың Наадым хүрежинге Чөөн-Хемчик кожууннуң аныяк мөгези Мөңге-Эртине Куулар шүглүп үнген. Сүт-Хөл кожууннуң шыырак мөгези Кайгал-оол Ондар үжүүрлешкен.
ТР-ниң Баштыңы Владислав Ховалыг, ТР-ниң Дээди Хуралының Даргазы Каң-оол Даваа болгаш Күчүтен Мөге Аяс Моңгуш олар тиилекчилерге шаңналдарны тывыскан.
Шүүлген мөгеге 500 муң рубль, үжүүрлешкен мөгеге - 250 муң, үшкү, дөрткү чер алганнарга - 125 муң рубльдерни, бештен сеске чедир хүрешкен мөгелерге 50 муң рубль акшаларны шаңналга берген.
Бо хүрешке күрүнениң шаңналдарындан аңгыда, күзелдии-биле ынак мөгелеринге деткикчилээн хамаатыларның саны хөй болган. Шүүлген болгаш үжүүрлешкен мөгелерге чарлакчы бежен-бежен хураганны белекке берди. Кайгал-оол Ондарга Кара-Хаак чурттуг хамааты чүгүрүк малды, Чөөн-Хемчиктен бир кижи богбаны белекке берген дээш оон-даа өске акша белектерни ынак мөгелеринге аарыкчылар берген.
А.Ондар.
Буян ООРЖАКТЫҢ тырттырган чуруктары.
