РФ-тиң тудуг болгаш чуртталга-коммунал ажыл-агый сайыдының оралакчызы Никита Стасишин Тывага келген.
Ажыл-агыйжы сургакчылаашкын үезинде республиканың эң-не кол тудуг компаниялары-биле ол ужурашкан. «Мөңгүн», «Иркутский», «Полигонный» микрорайоннарында тудугларга четкеш, ажылдың кайы хире чоруп турарын хынааш, чедер-четпестер болгаш тургустунуп келги дег шаптараазыннар бар-чогун ылавылаан.
Тудугларны эргий кезээн соонда, Чазак бажыңынга ажыл-агыйжы түңнел хуралды ТР-ниң Баштыңы Владислав Ховалыг эрттирген.
«Бөгүн РФ-тиң тудуг болгаш чуртталга-коммунал ажыл- агый сайыдының оралакчызы Никита Стасишин-биле кады ажылдап хүнзеп тур бис. Ол Тывада чурттаар оран-сава тудуунуң айтырыгларын харыылап турар дээрзин сагындырайн. Регионнуң сайзыралынга эң-не чугула черни ээлеп турар углааныышкын болгай. РФ-тиң Президентизи Владимир Путинниң деткимчези болгаш РФ-тиң Тудуг яамызының идепкейлиг киржилгези-биле Тывага чиигелделиг ипотека программазын эгелээн бис. Никита Евгеньевич ук программаны ам-даа беш чыл узадыр деп дыка шын чугаалап тур» – деп, Владислав Ховалыг демдеглээн.
«Тудугларга бодум четкеш, көрдүм. Ажыл кончуг эки чоруп турар-дыр. Чиигелделиг ипотека программазы Тывадан аңгыда Россияның өске регионнарында чок. Силерниинде шак мындыг программаның бо хүннерде ажылдап турары дээрге-ле, регионнуң удуртукчузунуң шалыпчы ажылы-дыр. 2030 чылга чедир ук программаны узадыр аргаларны өөренип көөрү чугула деп санап тур мен. Ынчангаш чаа туттунган микрорайоннарга уруглар садтары болгаш школалар тудары эргежок чугула деп көрдүм» – деп, Никита Стасишин чугаалаан.
Оон ыңай республиканың девискээринде 2 хуу чиигелделиг ипотека программазының Тывада боттанылгазынга үнелелди Никита Стасишин берген.
«Чиигелделиг ипотека программазын Тывага соксаткан ажыы чок. Бар аргаларны төндүр ажыглааш, эчизинге чедиргеш, немей акша-төгерик тыптынары чугула. Чүге дээрге Тывада чурттаар оран-сава айтырыы хереглеттинип турар-дыр. ДОМ.РФ-те ажылдап турар коллегаларым-биле шупту төлевилелдерни таныштырып, Тывага чүгле хөй квартиралыг бажыңнар тудуун эвес, а хууда чурттаар оран-сава тудар черлерни база сайзыраткаш, туттунар аргаларын өөренип көөрүн дилээр бис» – деп, Никита Стасишин немээн.
Дараазында ТР-ниң Чазааның Даргазының оралакчызы Олег Лукин республикада тудуг адырынга хамаарышкан ажылдарның дугайында илеткелди кылган.
«Республиканың социал- экономиктиг хөгжүлдезиниң бот-тускайлаң программазының ачызында Кызыл хоорайның болгаш Кызыл кожуунну улаштыр тударының план төлевилелдери тургустунган.
Бо хүннерде Тывада тудуг материалдарының бүдүрүлгелерин ажылдап кылган. Оларны улаштыр сайзырадыры чугула. Ол ажылдар тудуг адырының бурунгаар хөгжүлдезинге улуг идиг болган. Бо хүннерде чүгле Кызыл хоорайның девискээринге тудуг тудар чер ниитизи-биле 771 муң дөрбелчин метрни тургузуп турар. 674 муң 500 дөрбелчин метр черге улуг хемчээлдиг тудуглар тудар 22 тудуг компаниялары-биле керээлер чардынган. Ол дээрге хөй квартиралыг 289 бажың азы 14 200 квартира-дыр» – деп, Олег Лукин чугаалаан.
«Чиигелделиг ипотека программазы-биле 2023 чылда Тывага 801 ипотека чээлизин бээри планда көрдүнген турган, ынчалза-даа пландан барык 30 ажыг хуу ажыр күүсеттинген. 2022 чылда тус черниң банкылары чаа бажыңнардан 710 ипотека чээлизин берген. А 2024 чылда 162 чиигелделиг ипотека чээлизин бээри планда көрдүнген. Ооң мурнунда чылдарда Тывага кажан-даа ол хире хөй түңнүг ипотека чээлизи бербейн турган дээрзин демдегледим» — деп, Владимир Донских чугаалаан.
Айдың ОНДАР.
Ада ТЮЛЮШ биле Чингис СААЯНЫҢ тырттырган чуруктары
“Шын” №12 2024 чылдың февраль 16
