Республика девискээринге 5400 чаштар төрүттүнген. Ол дээрге эрткен чылга деңнээрге, 713 азы 12,4 хуу эвээш болуп турар. Ындыг-даа болза Россияның өске субъектилериниң аразында Тыва төрүттүнген чаштар саны-биле бедик көргүзүглүг болган.
Бо-ла сан-чурагай аразында сонуурганчыг чүүл, 5400 төрүттүнген чаштарның 42-зи ийистер болган.
***
Республика девискээринге чоннуң өлүп-хораар чоруу 6,7 хууга кызырылган. Эмчилерниң күжениишкинниг ажылының түңнелинде 179 кижиниң амы-тынын камгалап алыр аргалыг болган. Бо көргүзүглер Россияның өске регионнарынга деңнээрге, база бир эң-не чавыс көргүзүглерниң бирээзи болуп турар. Чидириглерге хамаарыштыр чугаалаар болза, 2021 чылдың 11 айның дургузунда 2690 кижи чок болган болза, 2022 чылда – 2511.
***
Тывага 2022 чылда 211 эмчи немешкен. Оларның аразында ординатура доозукчулары – 94, эмчиниң дээди өөредилге черлериниң доозукчулары – 28, өске регионнардан хаара туттунган эмчилер 89 четкен.
Республикаже эмчилерни хаара тударынга “Көдээ черниң эмчизи”, “Көдээ черниң фельдшери” федералдыг программалар салдарлыг болган. Ынчалдыр ук программалар-биле 59 эмчи, 2 фельдшер Ямал-Ненецк, Сахалин, Иркутск, Амур, Кемерово, Новосибирск областардан, Москва, Якутия, Хакасия, Ханты-Мансийскиден келген. Оларның аразында Тывадан чорупкан эмчилерниң катап чанып келгилээни өөрүнчүг.
Оон аңгыда, республика девискээринге регионалдыг программаларны чедимчелиг боттандырган. Оларның дузазы-биле чаңгыс удаа алыр 1 сая рубль, беш чыл дургузунда чыл санында 200 муң рубльди бээр деткимчени эмчилер алган.
К. МОНГУШ белеткээн.