2024 чылда Тывага капитал септелге программазы-биле шупту 167 муң дөрбелчин метр шөлдүг, хөй аал чурттаар 54 чуртталга бажыңынга капитал септелгелерни чоруткан. Республиканың найысылалы Кызылда эң хөй – хөй аал чурттаар 44 бажыңны септээн. Оон аңгыда, Ак-Довуракта — дөрт, Шагаан-Арыгда — беш, Хову-Аксы суурда бир бажыңны чаарткан. Капитал септелге ажылдарынче ниитизи-биле 116, 27 сая рубльди чарыгдаан.
Регионалдыг капитал септелге фондузунуң дыңнатканы болза, 2025 чылда 129 558,40 дөрбелчин метр ниити шөлдүг хөй аал чурттаар 44 бажыңны септээр, ооң 37-зи – Кызылда, 5-и – Ак-Довуракта, 2- зи – Шагаан-Арыгда. Республиканың Чазаа эрткен неделяда 2025 чылда септээр бажыңнарның даңзызынче хөй аалдыг ийи бажыңны киирген өскертилгелиг, капитал септелге планын бадылаан.
Тываның чурттакчылыг черлеринде хөй аал чурттаар бажыңнарда ниити өнчүнүң капиталдыг септелгезин организастаарының дугайында республика хоойлузунга өскерилгелерни киирген. Тываның Баштыңы Владислав Ховалыг ында саналдаан капиталдыг септелгеже дадывырларны санаар хуусааларны, 2043 чылга чедир санаан капиталдыг септелгениң регионалдыг программазынче кирген хөй аал чурттаар бажыңнарның техниктиг байдалын хынаарын организастаарының чурумун, база ол ышкаш регионалдыг программаны белеткээриниң болгаш бадылаарының азы ынаар өскерилгелерни киирериниң чурумун тодараткан эдилгелерни деткээн.
Сөөлгү үш чылда капитал септелге программазы-биле Тывада хөй аал чурттаар 101 бажыңны септээн. Бажыңнар иштиниң инженер системаларын, лифт дериг-херекселдерин, крышаларын болгаш даштын септээр ажылдарын чоруткан. Ажылчыннар бажыңның ниити саналга дериг-херекселдерин салып, үрелген артык кезектерин солуп, кирер черлерни чылыглаан.
А. МОНГУШ.
Чурукту интернет четкизинден хоолгалаан.
“Шын” №6 2025 чылдың февраль 20
