Орус географтыг ниитилелдиӊ Москвада штаб-квартиразынга ТАР-ныӊ ССРЭ-ниӊ составынче бактаап киргениниӊ 80 чылынга тураскааткан байырлыг хурал ноябрь 15-те болуп эрткен.
Үстүнде айыткан ниитилелдиӊ Тывада салбыры хемчегни ук организацияныӊ күүсекчи дирекциязы-биле дугуржуп алгаш, республиканыӊ Баштыӊы В. Ховалыгныӊ даалгазы-биле эрттирген.
«80 чылдыӊ нүүрүнде Россия-биле кады: географияныӊ болгаш аӊаа чоок эртемнерниӊ чедиишкиннери» деп темалыг төгерик столду организастаан.
Тываныӊ Чазааныӊ Даргазыныӊ оралакчызы – ТР-ниӊ Москва хоорайда бүрүн эргелиг төлээзи Чечен Чоксум Орус географтыг ниитилелге өөрүп четтиргенин илереткен. Тыва Арат Республикныӊ эки тура-биле ССРЭ-ниӊ составынче бактаап киргенинден бээр 80 чылдааны дээн ышкаш онза демдеглээр төөгүлүг болуушкунче кичээнгей салып турарын үнелээн.
Эртем ажылдакчыларынга ТР-ниӊ Баштыӊыныӊ шаӊналдарын байырлыг ёзу-биле тывыскан. «Тыва Республиканыӊ алдалыг эртем ажылдакчызы» деп хүндүлүг атты Кирилл Чистяковка, ТР-ниӊ Баштыныӊ Хүндүлел бижиин Юрий Баденковка, «Шылгараӊгай күш-ажыл дээш» деп ТР-ниӊ медалын Владимир Семеновка, «ТАР-ныӊ эки тура-биле ССРЭ-ниӊ составынче бактаап киргенинден бээр 80 чылдааны» ТР-ниӊ медалын Марина Килуновскаяга берген.
ТР-ниӊ Дээди Хуралыныӊ Даргазыныӊ өмүнээзинден шаӊналдарны Белекмаа Мунге тывыскан. Москва хоорайда эртем адырында ажылдап чоруур эртемденнер – Зоя Анайбанны, Марианна Харунованы, Надежда Оюнну болгаш Екатерина Пермякованы ТР-ниӊ Дээди Хуралыныӊ Хүндүлел болгаш Өөрүп четтириишкинниг бижиктер-биле шаӊнаан. Федералдыг биле регионалдыг эртем организацияларыныӊ аразында кады ажылдажылгага идепкейлиг дузалап чорууру дээш Белекмаа Мунге эртемденнерге өөрүп четтиргенин илереткен.
Төөгүлүг байырлалче Орус географтыг ниитилелдиӊ Санкт-Петербург хоорайда салбырыныӊ президентизиниӊ оралакчызы Кирил Чистяковту, «К.С. Шойгу аттыг культура фондузунуӊ» тургузукчузу Ирина Шойгуну, регионалдыг сайзырал департаментизиниӊ директору Артур Латыповту болгаш өске-даа хүндүлүг аалчыларны чалаан.
Театрныӊ М.С. Щепкин аттыг дээди училищезиниӊ студентилериниӊ ыры-хөгжүмнү, танцы-самны байырлыг хурал соонда, бараалгадып көргүскен. Чалаттырган аалчыларга Орус географтыг ниитилелдиӊ штаб-квартиразынга экскурсия эрттирген. Организацияныӊ төөгүзү, Тываны болгаш Сибирь регионун шинчилээринге орус эртемденнерниӊ үлүг-хуузунуӊ дугайында таныштырган.
Республикага даг-тывыштыг үлетпүрнү кедилиг сайзырадырыныӊ оруктарын, Тываныӊ биосфера-экология талазы-биле бергедээшкиннерин шиитпирлээринге кады ажылдажылганыӊ угланыышкыннарыныӊ дугайында сайгарып чугаалашкан. Эртемденнер илеткелдерни дыӊнап, боттарыныӊ шинчилелдерин таныштырып, тус-тус адырларныӊ эксперттери болуп, арга-дуржулгазын солушкан.
Тываныӊ Москвада төлээлел чериниӊ медээлеринден.
