Кызылдың үлетпүр парыгында дүктүң бирги болбаазырадылга цегиниң дүк чуур комплекстиг шугумун бюджеттен дашкаар 116 сая рубль акша-биле садып салган. Ооң дугайында Тываның Экономиктиг хөгжүлде яамызы дыңнаткан. Күрүне деткимчезиниң акша-хөреңгизи-биле даштыкы четкилерни – канализацияны, суг хандырылгазын, өртке удур суг хандырылгазын киирип, чамдык дериг-херекселдерни эптээн. Арыглал шугуму, чадаларны, иштики болгаш даштыкы электри системаларын тудуп-эптээр ажылдар чоруп турар, август төнчүзүнге чедир өрээлдер агаарладыр дериг-херекселди тургузуп доозар.
Цех малчыннардан дүктү хүлээп эгелей берген. Бөгүнге чедир республиканың кожууннарындан 900 хире тонна чугдунмаан дүктү садып алган.
«Республикада дүк хүлээп алыр чер ажылдап эгелээнинге малчыннар амырап турар. Дүктүң шынарындан база өңүнден ону садып алырының өртектери аңгы. Чижээ, тырый баспаан ак дүктүң өртээ 1 килде 10 рубль, а кара дүктүң 5 рубль болза, а бир кил тырый бастырган дүктү 20 рубльге, а кара дүктү 15 рубльге садып ап турар бис. Өвүр, Каа-Хем, Бии-Хем, Бай-Тайга, Чеди-Хөл база Таңды кожууннардан аңгыда, шупту муниципалитеттерде дүк хүлээр пунктуларны ажыттывыс» — деп, дүк болбаазырадыр цехтиң удуртукчузу Рудольф Дарбак чугаалаан.
Аштап-арыглап болбаазыраткан дүктү чүң, шекпен, кидис, техника чылыглаар болгаш өске-даа кылыглар бүдүрүп турар Россияның пөс-таавы бүдүрүлгелеринче дужаар. Хой дүгү пөс-таавы бүдүрүлгезинге эң ажыктыг, шынарлыг, болбаазырадыры белен, катап ажыглап болур деп санаттынар чиг эт.
Инвестиция төлевилели-биле Кызылга ажыттынар бүдүрүлгеге 39 чаа ажылчын олуттар тургустунар, амдыызында ында дүк хүлээп алыкчылары, аңгылап-сорттаар кижилер, таңныыл, контролёр дээш 13 кижи ажылдап турар. Инвестор чыл төнчүзүнге чедир ажылчыннарны бүрүн четчелээр.
«Сергеихинский текстиль» ААН инвестор 2020–2024 чылдарда Тыва Республиканың социал-экономиктиг хөгжүлдезиниң бот-тускай программазы-биле дүктүң бирги болбаазырадылгазын организастаар инвестиция төлевилелдериниң шилилде мөөрей эрткенин сагындыраал. Төлевилелдиң өртек-үнези 349,96 сая рубль, ооң иштинде субсидия акшазы 179,96 сая рубль, бюджеттен дашкаар инвестор акша-хөреңгизи – 170,0 сая рубль болуп турар.
А.МОНГУШ.
Чуруктарны интернеттен алган.
“Шын” №63 2024 чылдың август 21
