Россияның “Билиг” ниитилели биле Саң-хөө билиглерин сайзырадырының ассоциациязы саң-хөө билиглерин өөреникчилерге, студентилерге, аныяктарга өөредириниң акциязын эрттирип турар. Школаларга, колледжилерге болгаш дээди өөредилге черлеринде саң-хөө шөлдерин тургузуп, акшаны санап, чарыгдап болгаш камнап билиринге өөредип турар.
Саң-хөө акциязынга Тыва Республика база каттышкан. Бо акцияның угланыышкыны-биле Кызылга саң-хөө билиглериниң талазы-биле баштайгы лекция номчуттунган. Ону Тываның информатизация технологияларының техникумунуң студентилеринге Кызыл хоорайның мэриязының саң-хөө департаментизиниң начальниги Сайлык Чудакова номчаан. Акша чарыгдаарын планнаарының, карылга чок чарыгдап билириниң болгаш камнаарының аргаларының дугайында студентилерге ол чугаалап берген.
Акшаны инвестициялаарының болгаш оон орулганы үндүрүп алырының саң-хөө аргаларынга хамаарыштыр өөредилге акциялары республиканың школаларынга, ортумак болгаш дээди өөредилге черлеринге эртер.
Технологияларның аажок сайзырааны-биле акшаны орулгалыг ажыглаарының аргалары, ол ышкаш мөлчүкчү чорук аажок нептерээн. Ынчангаш саң-хөө билиглерин сайзырадыры, амгы технологияларны билдилиг ажыглаары кончуг чугула. Ол билиглерге кижилерни бичии чажындан өөредири чугула деп, Россияның “Билиг” ниитилелиниң чиңгине директору Максим Треваль санап турар.
Россияның “Билиг” ниитилелиниң медээзинден.
“Шын” №10 2025 чылдың март 20