ГРАНТ
Тыва Республиканың Көдээ ажыл-агый яамызының «Агростартап» грантызының конкурузунуң комиссиязы «Агростартап» грантызының ийиги чадазының түңнелдерин үндүрген.
«Агростартап» грантызының ийиги чадазының тиилекчилериниң бирээзи Чаа-Хөл кожуунда аныяк сайгарлыкчы Тамир Чечек-оол. Грантының акша-хөреңгизи-биле Тамир Даниярович «Беларусь» марканың чаа тракторун кожуг дериг-херексели-биле кады садып алган. Ону мал чеминиң белеткелинге Тамир ажыглап эгелей берген. Аныяк сайгарлыкчының ажыл-агыйының кол угланыышкыны – чаңгыс чылдыг сигеннерни ажаап өстүрүп, оон мал чемин белеткээри.
«Агростартап» грантызын ойнап алырынга юридиктиг дузазы дээш республиканың Көдээ ажыл-агый яамызының «Агростартап» грантызының конкурузунуң комиссиязының кежигүннеринге өөрүп четтиргенин Тамир Чечек-оол илереткен.
Ш. ЛОПСАН белеткээн.
Чуруктарны интернеттен хоолгалаан.
"Шын" №53 2024 чылдың июль 17
