Июль 8 – Бүгү-российжи өг-бүле хүнү
Алдан чыл кады — бриллиант куда
Бүгү-российжи өг-бүле хүнүнде найысылал Кызылда Аныяктар өргээзинге Санам-оол биле Чечекмаа Аг-оолдар 60 чыл кады чурттаан – бриллиант кудазын байырлыг байдалга демдеглээн.
Аг-оолдар 4 ажы-төлдү төлептиг кижилер кылдыр кижизидип өстүрген. Бо хүнде олар 10 уйнуктуг болгаш 9 уругларының ажы-төлү, удавас 10 дугаарын манап турар энерелдиг кырганнар.
Байырлыг езулал үезинде Санам-оол Аг-оол өг-бүлезиниң аас-кежииниң чажыды-биле үлешкен: «Хөй чылдар ишти кады чурттаарының чажыды — бот-боттарынга ынак, хүндүткелдиг болуру база алгыш-кырыш чогунда. Кижилер ажылынга-даа, бажыңынга-даа бот-боттарын хүндүлежип чорууру чогумчалыг»
Өгленишкен «аныяктарга» ажы-төлү, дөргүл-төрелдери, Юстиция, Кадык камгал яамыларының төлээлери, ол ышкаш Дээди Хуралдың, Мэрияның болгаш Пенсия фондузунуң ажылдакчылары байыр чедирип келген.
«Кезээде ада-иевистиң хайгааралынга өскен-даа болзувусса, бисти шиитпирлиг кижилер кылдыр өстүрген. Ада-иевистиң 60 чыл кады чурттааны дээш өөрүп тур бис. Оларның быжыг ынакшылы өске өг-бүлелерге улуг үлегер болур» – деп, оглу Артур Аг-оол чугаалаан.
Санам-оол биле Чечекмаа Аг-оолдар бо чылын ийи улуг байырлалын демдеглеп турар – бриллиант кудазы биле 85 харлаан юбилейлери.
А. СОЯН.