Үе-шаг өскерлип, кижилерниң амыдырал байдалы көшкүн чуртталгадан аңгы апарган бо өйде кандыг-бир байырлалга йөрээл салыры база күзелдерге чагыртып чоруур апарганы чажыт эвес. Кижи бүрүзү чаа төрүттүнген чаш уругга, өгленип турар аныяктарга, мугур харын демдеглээн чоок кижизинге байыр чедирип тура, узун назынны, быжыг кадыкшылды күзевишаан, амгы үениң хереглелдерин чедип ап, улуг этти эдилээр, чараш оран-сава ээзи болур кылдыр йөрээл салыр апарган болгай. Ынчангаш амгы шагның бир йөрээлин силерге бараалгадыр-дыр бис.
3 харлаан уруг доюнга йөрээл
Тогдук дег каас болзун,
Торлаа дег өөр болзун,
Бажы агаргыже чурттап,
Баштың болуп
Аймаан башкарзын!
Бажың-балгат, чычаан-хөлге
Айыраң каас чараш болзун.
Өшкү-хою өөн долганзын,
Өөр чылгы, инек малы
Алаак сыңмас оъттап чорзун!
Алдар-аттыг, хүндүткелдиг,
Алыс боду оожум-топтуг,
Эдеришкен эштиг-өөрлүг,
Энерел сеткил, буян долган,
Төлептигниң төлептии бооп,
Төрел чонга мактаттырзын!
Төрээн дылын хумагалап,
Төөгүзүн кадагалап,
Кадагааты дылдардан бээр
Каш-каш дылды билир болзун!
Эртем-билии улуг болзун,
Эктин ашкан эттиг болзун,
Агар саны, кошелёкка
Акша-көпей үзүлбезин!
Чүдүлгелиг, сүзүктүг бооп,
Чүрээ-биле сүмележип,
Чагыг сөстүг улуу болуп,
Салгалдарны хаара тутсун!
Шулуңайнып чассып өскеш,
Чуртувусту тудар болзун!
Угааны чарт, билии делгем
Удуртукчу үрен болзун!
“Шын” №44 2026 чылдың ноябрь 12
"Шын" солуннуң МАХ-каналынга каттыжыңар: max.ru/channel_shyn