Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев «Күзелдер Шивизи» деп Бүгү-российжи ачы-буян акциязы-биле аныяк сибирьжилерниң Чаа чылда ыдык күзелдерин боттандырган.
Алтай Республиканың найысылалындан дөрт харлыг Костяга Чаа чылдың хуулгаазыны бар деп чүвеге бүзүреп болурунга бүрүн эргелиг төлээ дузалаан. Оол байырлал бүдүүзүнде аъш-чем кылырын сонуургап, уругларның ышкаш ойнаар кухнялыг болурун күзээн. Костя бүрүн эргелиг төлээден белек кылдыр өөредиглиг ойнааракты алган.
Кемерово облазының Новокузнецк хоорайдан беш харлыг Катяның күзели база бүткен. Шимченгир болгаш сонуургак кыстың ынак оюну – эштир. Бүрүн эргелиг төлээ Катяга белек кылдыр бүдүн чылда эштип ойнаар бассейнни берген. Бичии Катя авазы, ачазы-биле эштир бассейнинче чорупканнар.
Омск хоорайдан алды харлыг Илья уруглар садында хөй санныг эш-өөрү-биле танцылаарынга ынак. Бо удаа ол интерактивтиг ойнаарактыг болурун күзээн. Илья Анатолий Серышевтен өөредиглиг ойнаар наборну белекке алгаш, канчаар-даа аажок өөрээн.
Алтай крайның Бийск хоорайдан сес харлыг Мирослава чырыктыг ширээге элезин-биле чуруттунарынга ынак. Бүрүн эргелиг төлээниң дилээ-биле оолга белекти дамчыдып, бүгү-ле чүүлдерге өөрүшкү-маңнайны Чаа чылда күзээн. Мирослав – чогаадыкчы сонуургалдарлыг, хөгжүмге база чуруттунарынга ынак ийиги классчы.
Новосибирск облазындан он ийи харлыг Алексей шивизин боду каастаар болгаш, Чаа чылды дыка манаар. Чаа чылдың Шивизин хөгжүмнүг дүрзүлер-биле каастаарын ол шагда-ла күзеп келген. Бүрүн эргелиг төлээ оолдуң ол күзелин билип алган дораан-на, ону боттандырган. Ам Алексейниң бажыңы дыка чараш – хөглүг хөгжүмнүг ойнаарактар оолга-даа, ооң өг-бүлезинге-даа улуг өөрүшкүнү сөңнээн.
Красноярск хоорайдан он бир харлыг Александра Новосибирск хоорайның аквапарыгын көрүксеп чораан. Бүрүн эргелиг төлээниң дузазы-биле уругнуң күзели ам боттанган. Александраның төрүттүнген хүнүнүң бүдүүзүнде авазы-биле ийилдирзин Новосибирск хоорайже чалаан, олар Россияда эң улуг хааглыг суг аттракционунга бүдүн хүннү эрттиргеннер. Кайгамчык чүүлдер ооң-биле төнмээн, эртенинде Новосибирскиниң Р.А. Шило аттыг зоопарыгынга чорааны уттундурбас аян-чорук болуп артып калган.
Иркутск хоорайдан он харлыг Даниилге чылдың кол болуушкуннарының бирээзи - шанактаан ыттарны мунары болган. Бүрүн эргелиг төлээ оолдуң онзагай дилээн «Күзелдер Шивизинден» тырттып алгаш, ону боттандырган.
Красноярск крайның Лесосибирск хоорайдан алды харлыг Максимниң кол күзели Чаа чыл бүдүүзүнде боттанган – регионда шериг кезектериниң бирээзинге экскурсиялап, шериг дайынчы хыдыкчы самолеттуң кабиназын ол көрген. Максим самолёттар сонуургаар, ынчангаш аңгы-аңгы авиамодельдерни шагда-ла чыып эгелээн. Оолдуң ачазы тускай шериг операциязының мурнуку одуруунда төрээн чуртун камгалап турар, ынчангаш-ла боор ол шериг авиациязын дыка сонуургаар. Шериг авиадиспетчерлер ужудуушкуннарны канчаар башкарып турарын Максим биле авазынга таныштырып, шериг кезээниң столоваязының дүштеки чемин сонуургаткан.
Чаа чылдың бүдүүзүнде Томск облазындан сес харлыг Николайга езулуг кайгамчыктыг чүүл болган. Бүрүн эргелиг төлээниң дузазы-биле ооң улуг күзели – электропоезд башкарыкчызы болуксааны боттанган. Николай электропоездизиниң кабиназынга олурупкаш, ону башкарып, машинизинден бөрттү белекке алган.
Сибирьниң регионнарындан өске-даа уругларның ыдык күзелдери бо чоокку хүннерде база боттаныр. Декабрь 20-де, Москвага эрткен Күрүне Чөвүлелиниң хуралының мурнунда, бүрүн эргелиг төлээ "Күзелдер Шивизинден" уругларның күзелдерин бижээн дөрт шарны база тырттып алганын сагындыраал. Анатолий Серышев Донецк Улус Республикадан сес харлыг Викторияның, Алтай крайдан он ийи харлыг Вадимниң, Омск облазындан он бир харлыг Анастасияның болгаш Томск облазының Северск хоорайдан он ийи харлыг Дарьяның күзелдерин күүседир.
Анатолий Серышевтиң «Күзелдер Шивизи» акцияга киржири чаагай чаңчыл апарган. 2023 чылда бүрүн эргелиг төлээ Сибирь регионнарындан болгаш Луганск Улус Республикадан он үш уругнуң эң-не улуг күзелдерин боттандырарынга дузалашкаш, а бир чыл бурунгаар сес аныяк сибирьжилерниң Чаа чыл күзелдерин күүсеткен.
«Күзелдер Шивизи» деп акция Россияның Президентизи Владимир Путинниң саналы-биле 2018 чылда эгелээн. Төлевилел Чаа чылдың илби-шидизин көргүзүп, дузага хереглелдиг кижилерниң күзелдерин боттандырар күзелдиг кижилерни каттыштырып турар. Акцияга 3 хардан 17 харга чедир назылыг, амыдыралдың берге байдалынга таварышкан, кадыының байдалы кызыгаарлаттынган уруглар, өскүс болгаш чединмес өг-бүлелерниң ажы-төлү киржип турар. Тускай шериг операциязында киржип турар дайынчыларның болгаш ЛУР, ДУР, Запорожье база Херсон областарның девискээринде чурттап турар өг-бүлелерниң ажы-төлүнче онза кичээнгей салдынган. Алды чыл дургузунда 213 муң ажыг уругларның эң-не күзээн күзелдери боттанган.