| Октябрь 1 — Бүгү-делегейниң улуг назылыглар хүнү |
Эрзин кожууннуң Мөрен суурда аныяк-өскенге үлегер-чижээн көргүзүп, хөй-ниити ажылдарынга идепкейлиг киржип чоруур улуг назылыг хоочуннарывыс хөй. Олар чокта, кандыг-даа хемчеглер, байырлалдар эртпес, оларның аразында кандыг талантылыг, эрес-шоваа кырган-авайлар, кырган-ачайлар чок дээр.
Ылаңгыя Мөренниң көдээ Культура бажыңында “Кадыкшыл” деп бөлгүмнүң кежигүннери эң-не идепкейжи. Олар кымнарыл дээрге: Ягаан Менмеровна Бадарчы, Саяна Кыргысовна Худер, Соскалмаа Самбууевна Самдан, Санчымаа Александровна биле Дажы-Серен Күдерекович Бичелдейлер, Чечекмаа Кыргысовна Сади, Светлана Ырбыевна Доктаалай, Наталья Куровна Сади, Раиса Бады-Шулууевна Ондар дээш оон-даа өскелер.
Бо хоочуннарның аразында огородчулар база бар, оларга Чечекмаа Кыргысовнаны, Зинаида Доржуевнаны, Санчымаа Александровна биле Дажы-Серен Күдерекович Бичелдейлерниң өг-бүлезин онзалап демдеглеп болур.
Бо чылын картошка, ногаа аймаа дыка эки үнген деп хоочуннар чугаалап турду. Ылаңгыя Чечекмаа Кыргысовнаның дүжүдү элбек болган. Эрес-кежээ кырган-авай ажаап алган картошказының чамдыызын хөй өг-бүлелерге анаа халас үлепкен болду. Буянныг кырган-ава бо чылын 80 харлап турар. Назыны улуг-даа болза, бажыңының иштики-даштыкы ажылын шуптузун боду кылыр, болза-даа эрес-кежээ хоочун болгай.
Ынчангаш аныяк-өскенивиске бо хоочуннарывыстан үлегерден алырын күзээр-дир мен. Ол ышкаш Улуг назылыглар хүнүн таварыштыр шупту хоочуннарывыска быжыг кадыкшылды, узун назынны йөрээдивис.
/ Чаймаа САНДАК, “Кадыкшыл” бөлгүмүнүң удуртукчузу.
Чуруктарны авторнуң архивинден алган.
“Шын” № 39 2026 чылдың октябрь 8
"Шын" солуннуң МАХ-каналынга каттыжыңар: max.ru/channel_shyn