Барыын-Хемчик кожууннуң Кызыл-Мажалыкта Аныяктар төвү тургузар оран-савада капиталдыг септелге чоруп турар. Чаа септеттинген оран-сава көдээ черниң аныяктарының сайзыралынга эки салдарлыг төп болур.
Эрткен чылдың төнчүзүнде Аныяктар херектериниң талазы-биле федералдыг агентилелдиң «Аныяктар региону» деп мөөрейиниң 64 ажыг миллион рубль акша шаңналын Тыва ойнап алган. Ону республиканың аныяктар политиказын хөгжүдер талазы-биле программаны боттандырарынга ажыглаар.
Барыын-Хемчик кожууннуң Аныяктар инициативаларының төвүнүң удуртукчузу Чечек Монгуштуң чугаалап турары-биле алырга, бо чылын ол акша-хөреңги-биле Бии-Хем болгаш Барыын-Хемчик кожууннарда Аныяктар төптеринге капиталдыг септелгелерни чорудуп эгелээн.
«Бистиң кожуунче 16 миллион рубльди шилчиткен. Ооң мурнунда бо оран-савага 70 чыл бурунгаар туттунган, чаңгыс-да септелге кылдынмаан поликлиника турган. Ам бо оран-саваның иштинде капиталдыг септелгени кылып турары бо. Септеп, чаарткан соонда, аңаа музыка студиязы, спортчу шөл, коворкинг-төп, аныяктар кафези база боттарының төлевилелдерин ажылдап кылыр компьютер залы турар» — деп, Чечек Монгуш чугаалаан.
Аныяктар төвүн тургускан кол сорулга- зы – аныяктарны болгаш элээдилерни ажыктыг ажыл-херектерге хаара тудары, көдээ черден аныяктарның чоруурун эвээжедири.
Бистиң корр.
