Ооң мурнунда чылдарда Кызыл хоорайга чаңгыс-ла фонтан турган болза, сөөлгү чылдарда Азия төвүнде болгаш Тываның национал музейиниң даштында фонтаннар немешкен. Арат шөлүнде болгаш Азия төвүнде фонтаннарның капиталдыг септелгезин кылыр ажылдар 2024 чылдың август айда эгелээн.
Арат шөлүнде фонтанның ажыдыышкыны чоокта чаа болган, чүгле найысылалдың эвес, а бүгү республиканың чонунга өөрүшкүнү сөңнээн.
Азия төвүнде фонтанның септелгезин 2024 чылдың октябрь 31-ге чедир септээр дугайында керээни 2024 чылдың бирги кварталында чарган турган. Септелге ажылдарын эгелээн, ынчалза-даа планда көрдүнген хуусаа ёзугаар ажыл дараазында чылдагааннарның уржуундан доозулбаан. Ол дээрге, бирээде, кышкы соок үе, ийиде, септелге ажылдарының үезинде плиталар тигленгеш, фонтанның суунуң куттулар савалары тиглени бээрге, ону солуур ужурга таварышкан. Улаштыр канчаар ажылдаарын шиитпирлээри-биле хамаарылга чок эксперттиң ажылының түңнелин манааш, ажыл саадаан. Ынчангаш ук чылдагааннарга даянып, ук керээниң хуусаазын 2025 чылдың август 31-ге чедир чылдырган.
Август 4-те тырттырар бөлүк-биле ук фонтанның капиталдыг септелгезиниң кайы хире чоруп турарын хынаар сорулга-биле Азия төвүнге четтивис.
Тываның кол архитектору Орлан Доңгактың тайылбырлааны-биле алырга, бо хүннерде септелге ажылының 75 хуузу боттанган. Ажылдар август 31-ге чедир доостур. Тудугда ниитизи-биле 15 кижи ажылдап турар. Азия төвүнүң девискээринде узун сандайларны, чечек клумбаларын болгаш ыры-хөгжүм дыңнаар колонкаларны чаарткан. Бо фонтан, Арат шөлүнде дег, аялгалар куттулар фонтан болур.
Айдың ОНДАР.
Буян ООРЖАКТЫҢ тырттырган чуруктары.
“Шын” № 30 2025 чылдың август 7
