Бөгүн Кызыл хоорайның төвүнде Арат шөлүнге Чоннуң чаңгыс деминиң хүнүн демдеглеп эрттирген.
ТР-ниң Баштыңы Владислав Ховалыг баштаан даргалар байырлалдың хүндүлүг аалчылары болган.
«Россияның база бир улуг ужур-уткалыг байырлалдарының бирээзи – Чоннуң чаңгыс деминиң хүнүн бөгүн демдеглеп тур бис. Чоннуң чаңгыс деминиң хүнү Россияның хөй омак-сөөктүг чонунуң эп-найыралын, патриотчу чоруун, төрээн чурттунга ынакшылын демдеглээр байырлал. Чурттуң төөгүзүнде, чонунуң эп-найыралында күрүнениң күчү-күжү сиңниккен. Хөй омак-сөөктүг чоннарның бот-боттарының аразында найыралындан, өске чоннарның езу-чаңчылдарынга хүндүткелинден бүгү чүве хамааржыр. РФ-тиң Президентизи Владимир Владимирович Путин чурттуң экономиктиг болгаш хөй-ниитижи тускай догуннаашкынын салбайн, чонну хаара тудуп турар. Россияның чедиишкиннери болгаш ооң камгалалы дээш Тыва база бодунуң үлүүн киириштирип чоруур. Республиканың чурттакчы чону чаңгыс эвес удаа тускай шериг операциязынга деткимчезин көргүскен» – деп, байыр чедириишкининиң үезинде Владислав Ховалыг демдеглээн.
Байыр чедириишкиннери ооң-биле кызыгаарланмаан. ТР-ниң Дээди Хурал Даргазы Каң-оол Даваа, 55-ки мото-адыгжы бригадазының командириниң хүлээлгезин күүседип турар подполковник Азат Фатхутдинов болгаш Ада-чурттуң дайынчылар өг-бүлелериниң комитедин удуртуп турар Айлана Дан-Сюрюн олар чыылган чонга байыр чедирген.
Чылыг-чымчак сөстер-биле байыр чедирген соонда, республиканың ат-алдарлыг артистери байырлалда чыылган чонга аян тудуп, ыр-шоорун бараалгаткан.
Бистиң корр.
Буян ООРЖАКТЫҢ тырттырган чуруктары.
